Nang heh ka Iew Nongrep, phuh mat ki nongdie ma rep

Ka jingwan iuh kjat ki nongthied ha ka Iew Nongrep ba la pyllong da ka sorkar man u bnai ka la poi sha kumba san hajar ngut eiei haduh mynta.Ha kane ka iew kaba long ha nongbah Shillong ha ka sien kaba phra, ki nongrep ki la wan die ia ki mar rep kiba mih katkum ka aiom bad ka long ruh ka rynsan ha kaba ki nongthied ki lah ban iakren ban iaphylliew jingmut bad ki nongrep.Kane ka iew ka la lum bad wanrah ia ki nongrep na kylleng ki jaka jong ka jylla ban wan pyni ia ki mar rep ba ki pynmih katkum ka aiom kynthup kum u kubi, u Riewhadem, u Sohtrun bad kiwei ki jhur ki soh.Ia kane ka iew la pyllong da ka kynhun 1917 iTEAMS hapoh ka tnad ka rep ka riang ka sorkar jylla bad la kyrshan da ka Meghalaya Farmers’ (Empowerment) Commission, la sakhi ia ka jingwan iashim bynta jong kiba bun ki nongthied kiba kwah ban thied ia ki marrep kiba dang plung.

Kane ka sienjam la shim da ka jingbuh thong jong u Myntri Rangbah ka jylla u Conrad K.Sangma na bynta ban pynkup bor ia ki nongrep bad ban pynkhlain bad kyntiew ia ka kam rep kam riang ha ka jylla.Ka kong Aroma Talang na Thadmuthlong B, Laskein Block, West Jaintia Hills, ka la iathuh ba ka la sdang ia ka kam rep khlem ai dawai naduh u snem 2025 bad bynrap ba kane ka rukom rep ka la ai jingmyntoi ia ka.Ka la ai ka jingiaroh ia ka tnad ka rep ka riang kaba la ai ia ka rynsan ban pyni ban die ia ki mar rep ba ka la pynpaw ka jingsngewkmen ba ka jingwan ki nongthied ruh ki la nangkiew.

Katba ka kong Store Kharlukhi na Kdiap, Thadlaskein, kaba la wan shim bynta ha ka sien banyngkong, ka la pynpaw ia ka jingsngewkmen ba ka jingwan tuid jong ki nongthied ha kaba ki marrep ba ka la wanrah ban die ha kane ka iew, la lah ban die tang hapdeng katto katne kynta. Ka la ai khublei ia ki nongthied bad kumjuh ia ka sorkar kaba la ai plie lad  bad ai ka rynsan ia ki nongrep ban wan die ia ki mar rep ba ki rep.