Da ki hajar iaid Proseshon ki Riewngeit Katholik

Da ki phew hajar ki riewngeit ka Balang Katholik hynne ka sngi u Blei, ki la shim bynta shitrhem ha ka Eucharistic Procession ne ka Proseshon Īukharis kaba ju pynlong man u snem da ka Cathedral of Mary Help of Christians, ha Laitumkhrah, Shillong. La sdang da ka jinglehniam bad ka jingduwai ha ka por mynstep bad hadien la pynlong ia ka Mass Bakhuid shwa ban sdang ia ka Proseshon Īukharis. Ha kaba u Most Rev Victor Lyngdoh u Arhbishop ka jylla niam bah Shillong ula ialam ia ka Mass Bakhuid ha ka jingdonlang ki Bishop kynthup ia u Most Rev Wilbert Marwein ka Nongstoiñ bad u Most Rev Ferdinand Dkhar jong ka Jowai. Katba ia ka jingiaid paidbah ne proseshon la sdang na Calvary ban leit sha Dhankheti, Shillong-Jowai Road, Laitumkhrah Main Road, Don Bosco Square bad la wan phai biang sha Calvary.

Kane ka Proseshon Īukharis ka la khring ia baroh ki riewngeit Catholic ym tang na nongbah Shillong hynrei wat ia ki riewngeit Katholik na kiwei pat ki Archdiocese ha kylleng ka rilum Khasi bad Jiantia.Ha kane ka sngi la sakhi ki surok ha nongbah ki khapngiah da ki paid riewngeit Catholic kiba la shim bynta ban iaid paidbah naduh kiba rit haduh kiba la heh.Nalor kane la iashim bynta ruh ha ka Proseshon Īukharis da ki Council Member ka Archdiocese, ki Parish Priest, Rector, Major Superior, Provincials, ki MLA, MDC, Deputy Commissioner ka East Khasi Hills, ki ophisar ka sorkar jylla bad ki riewngeit na kylleng ki jaka.

Ha ka por mynsngi u Archbishop ula pynbna ruh ia u snem 2025 kum u Jubilee Year halor ka phang “Pilgrims on Hope” bad ula pynbna ruh ia ka “The year of Sacrament of Reconcilation”. Ka Diamond Jubilee kan long ha u snem 2029 bad ka Centenary jong ka Archdiocese kan long ha u snem 2034.