Bym ioh tiket na ka VPP, yn iakhun bah Baitlang Pohsngap kum u kyrtong shimet

U bah Baitlang Pohsngap uwei na ki dkhot barim ka Voice of the People Party (VPP) ula rai ban iakhun ia ka ilekshon MDC na Jowai South Konstiwensi kum u kyrtong shimet. Kane ka rai jong u bah Baitlang ban iakhun ia ka ilekshon MDC kum u kyrtong shimet, ka long hadien ba u la shah pynduh tiket na ka VPP. Haba kren sha ki lad pathai khubor u bah Baitlang ula kam ba ha ka jingshisha ha shwa ban ai tiket ki nongialam ka VPP ki la dei ban pynlong ka jingwad bniah ia u briew kiba ki paidbah ki mon, hynrei ka la shu ai tiket khlem da bishar bniah.

“Kaba pynshaiong ia nga ka long ba kim don Unit kim don Circle bad haba nga twad jingmut ki la wad bniah ne em shwa ban ai tiket hynrei kam shym la don satia,” ula ong. U bah Baitlang udei ruh u kyrtong barim uba la ju iakhun teng ia ka ilekshon MDC na ka Congress ha u snem 2019 na katei ka konstitwensi. “Nga tip ba ngan nym jop ha ka ilekshon 2019 hynrei nga sngew kmen namar ba nga iakhun khlem pisa hynrei da mynsiem kaba khuid,” ong u bah Baitlang.

Ula ong ba ka jingthmu jong u ban iakhun ia kane ka ilekshon mynta ka long na bynta ban wanrah ka jingkhuid bad ban iada ia ka jylla na ka jingwan rung kyrtlep ki briew nabar. Namar kumba long mynta kane ka jylla ka la long kum ka iing bym don iingkhang jingker shuh ha kaba ki briew ki rung ki mih katba mon. Ula ong ba un iakhun khlem ka pisa namar lada u iakhun da ka pisa, kan nym don jingkhuid.  “Ka jaidbynriew ka la pait bad ka la nang hiar arsut. Lada ki paidbah ki pynjop ia nga ngan phaikhmat sha kawei na ka jingeh kata ka long ban iada na ka jingrung kyrtlep ki briew nabar,” ong u bah Baitlang.