T.6 lak ai u MR ia ka SURE ban thied kali ka Halfway Home, Jowai

U Myntri Rangbah ka jylla u Conrad K. Sangma hynne ka sngi ula ai ia ka cheque ba T.6,07,336 sha ka Society for Urban and Rural Empowerment (SURE) ban thied ia ki kali na ka bynta ka Halfway Home, Jowai ha Sabahmuswang, West Jaintia Hills. Ia katei ka pisa la ai ha u Dr. H.H. Mohrmen, Secretary jong ka Society for Urban and Rural Empowerment (SURE), ha ka ophis treikam jong u Myntri Rangbah bad la ai ia katei ka song tyngka lyngba ka Chief Minister’s Special Development Fund 2024-25 (NGO Category), ha kaba la iadonlang ka Project Coordinator ka Half Way Home Niwanka Shylla bad ka nongtrei mon sngewbha Ilasiewdor Gashnga bad Dr. H. Niang Block Development Officer jongka Thadlaskein Development Block.

U Conrad Sangma ula khublei ia ki nongtrei bad sngewnguh ia ki seng trei mon sngewbha halor ka jingai ka jingshakri kaba kordor ia ka jylla bad ula kitbok ia ki ba kin iai bteng ban long kiba seisoh ha ki snem kiban dang wan. Ka Halfway Home, kadei ka project kaba la pyniaid da ka Society for Urban and Rural Empowerment (SURE), kadei ka jaka sah bad jaka ai jingsumar ia ki briew kiba don jingduna ha ka bor pyrkhat ia kaba kila koit bad kim donkam shuh ban thiah ha ki hospital, kiba dei ki briew ki bym don iing don sem ne kiba la shah kyntait ha la ki bahaiing bad ia katei la plie ha ka 28 u Jylliew 2023.

Ka Halfway Home ha Jowai kala lah ban leit buh biang ia ki arngut ki nongpang sha ki iing ki sem jongki. Kadei tang ka Halfway Home kaba long napdeng ki 4 tylli ha ka jylla, kaba la ioh jingkyrshan na ka Directorate of Social Welfare, Shillong, kaba la lah ban kynjoh ia utei u mawmer.