Kyntu ia baroh ki kynhun ban iatreilang ban wanrah ia ka shongsuk

U Prof. Nirmalendu Saha, Vice-Chancellor Incharge ka North-Eastern Hill University (NEHU), Shillong ula pynpaw ba ka skulbah NEHU ka don hapdeng ki kynrum kynram ha kine ki taiew ba la dep bad u kwah ban pynsngew ia ki paidbah ka skulbah NEHU ban pynthikna ia baroh ba ki don ka jingshimkhia ban wanrah biang ia ka shongsuk shongsain na bynta ka jingpule bad ka roi ka par. Ha ka kyrwoh khubor u Prof. Nirmalendu Saha ula ong, “Hadien ba nga la shimti ia ka kam, ka jingthmu ba kongsan ka long ban wanrah ka bha ka miat ki samla pule, kiba long ka dohnud bad ka mynsiem ka NEHU. Nga la iakynduh da lade bad ki samla pule ha ki katto katne ki khep bad pynpaw ia ka jingsngewkhia ia ka koit ka khiah khamtam kito kiba shah thngan. Nga la pyrshang ban pynsngewthuh ia ki ban pynsangeh noh ia ka jingiakhih shah thngan, nga dang don ka jingkyrmen lyngba ka jingiakren sngewthuh jingmut shen yn leh ban weng ia ki jingeh.

“Nga iakren man ka por bad ka kynhun doktor kiba peit ia ki samla pule ba shah thngan na bynta ka koit ka khiah jong ki. Nga duwai ba kan ym mih kano kano ka jingjia ha ka liang ka koit ka khiah ki samla pule”  ula bynrap. Ula ong ba ula pynlong ïa ki jingïakynduh bad ki nongïalam jong ki kynhun bapher bapher, kynthup ïa ki nongialam ki samla pule ka NEHUSU, ki nongialam ka NEHUNSA bad ka Seng ki Nonghikai jong ka NEHUTA. Ka jingiakren ka long na bynta ban iatreilang ban weng ia ka jingeh ha ka skulbah NEHU, bad ula pynpaw ka jingkmen ba ka NEHUNSA ka la mynjur ia ki katto katne ki mar ba kongsan ban sdang biang ia ki kam. Kane ka sienjam kan pynthikna ba ki samla pule ba ioh baibam kin pyntreikam shakhmat bad ki kam pule puthi kin bteng biang khlem jingpynthut.

“Ban weng ia ki jingeh, la thaw ia ka Komiti ban tohkit kynthup ia ki nongialam na baroh ki kynhun ban weng ia ki jingeh. Ka komiti kan iaid shakhmat ban pyndep ia ka jingtohkit bad ia ka kaiphod ka yn sa ai sha ka tand pule ka sorkar pdeng. Nga sngewnguh ia baroh ki dkhot bad kyntu ban ai jingkyrshan ia ka kam da kaba khuid ryngkat ka jingkitkhlieh” la ong u Prof. Nirmalendu Saha. Ula bynrap ka jingbha jingmiat ki samla pule ka dei ka jingshimkhia bad ka jingkitkhlieh lang na baroh ki liang bad kum ka skulbah ki donkam ban pynroi bad pynkupbor ia ki samla pule, bad ki rai ba la shim kin buh hakhmat ia ki jingmyntoi ki samla pule.“Nga kyrpad ia baroh ki kynhun seng ha NEHU ban iatreilang bad buh sharud ia ki jingiapher jingmut, bad ban pynleit jingmut ha kawei ka thong da ka jingiatylli ban kyntiew ia ka pule puthi bad ka roi ka par ka skulbah NEHU” la ong Prof. Nirmalendu.