Jurip u Conrad bad u Sniawbha ïa ka jaka ban tei ïa ka New Shillong Administrative City

U Myntri Rangbah ka Jylla Conrad K Sangma ryngkat bad u Symbud Myntri Rangbah ka jylla uba khmih ia ka tnad Urban Affairs u Bah Sniawbhalang Dhar, kila leit jurip ia ka jaka ban tei ia ka New Shillong Administrative City, kaba kynthup lang ia ka Administrative Complex, ka Secretariat Building bad baroh ki Directorate ha ka jaka kaba 232 akar ha New Shillong Township. Haba iakren bad ki nongpathai khubor u Myntri Rangabh ula pynpaw ia ka jingkmen ban iohi ba bun ki project kila iaid shaid shaid ha ka jingpyntreikam ia ki.

“Nga la wan mynta ha ryngkat bad u Symbud Myntri Rangbah bad ki Ophisar ban peit ia ki project bapher bapher kiba la pyntrei bad ngi sngewkmen ban sakhi ba bun na ki, kila dep bad bun ruh ki dang iaid shaid shaid ka jingtrei bad haba kut jongu 2025, ngin sa iohi ia ka jingdep jong kiba bun ki project bad ha kaba kut jongu snem 2026, ngin sa iohi ia bun ki project kiba heh kiban sa dep lut” ong u Conrad. Ula ong “Ngi kmen ban iohi ba ki kam kila iaid shakhmat kumba la thmu bad nga ai khublei ia u Symbud Myntri Rangbah uba khmih ia ka Tnad Urban Affairs lem bad ia ka Tnad Urban kiba la pynleit jingmut bad pynrulong ia ki kam bad ia kiei kiei baroh”.

U Myntri Rangbah ula batai ruh da kaba ong, “Ngi ieng ha ka jaka ban tei ia ka Secretariat kaba thymmai bad ki Directorate thymmai jong ka Sorkar Meghalaya. Kan ym long tang ka Secretariat bad Directorate bad kumba phi iohi ha lyndet jong nga, kila don ruh shibun ki project kiba dang pyntrei ha kane ka thaiñ la kadei ka IT Park Phase-I & 2, Utility Mall, Integrated Command & Control Centre (ICCC), Skill Park bathymmai, Prime Hub, Heliport ka Shillong ruh yn tei hangne bad ka Urban Building kaba heh bha kan sa mih hangne”.