Shah jied u Lat kum u President ka IRCS Meghalaya State

Ka Indian Red Cross Society (IRCS) Meghalaya State Branch, hynne ka sngi ka la thung ia u Lat ka jylla u C.H. Vijayashankar kum u President ka IRCS Meghalaya State Branch ha ka jingialang ne ka Annual General Meeting kaba la pynlong ha Raj Bhavan, Shillong. Ha kane ka jingialang la thung ia u Lat ka jylla, kum u President ka IRCS Meghalaya State Branch bad la wanrah ia ka kaiphod treikam jongu snem 2023-24, ha kaba la batai shaphang ki jingseisoh ha ka jingpyntreikam ia ki kam da ka IRCS Meghalaya State Branch ha ka jylla. Ha kane ka jingialang la wan ban iashimbynta da ki dkhot jongka IRCS Executive Committee, ki Staff bad Volunteers, kiba la pynpaw ia ka jingskhem jingmut ka jongki ha kaban bteng ban pynneh ia ka nam jong ka Society ban trei bad shakri khlem shongthait ha ka jylla Meghalaya.

Ha ka kaiphod treikam, la batai bniah ia ki kam kiba la leh ha kaban ai jingiarap bad jingkyrshan ia ki para briew, ban kyntiew ia ka koit ka khiah bad ban pynlong ia ka Disaster Relief & Preparedness Program bad la pynpaw ruh ha ka jingialang ia ka jingtyrwa ban tei ia ka building kaba thymmai ban lah ban pyniar bad pynjanai ia ka rukom treikam ka jongka IRCS. Ha katei ka jingtyrwa, la pynpaw ia ka jingdon ia ka jingthmu ban pynkhlain ia ka IRCS khnang ba kan lah ban trei bha bad ban ai jingkyrshan na ka bynta ban ai jingshakri ia kito kiba mad ia ki jingeh ha ka jylla.

Haba kren ha ka jingialang u Lat ka jylla ula iaroh ia ka IRCS Meghalaya State Branch kaba la aiti ha ka jingshakri ia ka imlang sahlang bad ula banjur ia ka jingkongsan ban pynkhlain ia ka Red Cross ban iakhun ia ki jingeh kiba mih thymmai ha kaba iadei bad ka jingwan lynshop ki bor mariang, ka koit ka khiah bad na ka bynta ka bha ka miat ha ka imlang sahlang.