Ka Inquiry Committee ka la don ha Delhi, ban ai kaiphod halor ka jingjia ha NEHU

Ka Committee ba thung da ka tnat Ministry of Education ka Sorkar Pdeng ka la pyndep ia ka kaiphod halor ka jingkynnoh bym ler kam u Vice Chancellor (VC) ka skulbah NEHU. Ka Inquiry Committee ba lamkhmat da u Chairman barim ka UGC u Prof DP Singh bad u Vice Chancellor barim ka Assam University u Prof Dilip Chandra Nath ki la don ha Nongbah Delhi ban aiti ia ka kaiphod sha ka Sorkar Pdeng. Ïa kane la pyntip ba u Myntri Sorkar uba dei ruh u Nongialam ka Meghalaya BJP u Bah AL Hek. Haba kren sha ki lad pathai khubor u Bah Hek u la ïathuh ba u dang wan phai na Delhi ha ryngkat ki Nongialam ka Meghalaya BJP bad kane ka kynhun ka la ioh ban kynduh ïa u Myntri khynnah ka Sorkar Pdeng ba khmih ia ka tnat pule puthi.

“Namar ba u Myntri ka tnat Pule puthi ka Sorkar Pdeng u Dharmendra Pradhan um lap, ngi la kynduh noh ïa u Myntri Khynnah ba khmih ia ka tnat pule puthi u Sukanta Majumdar bad ngi la ïakren sani bha halor ka kynrum kynram hapoh ka skulbah NEHU” la ong u Bah Hek. U Bah Hek u la ïathuh ruh ba ka Meghalaya BJP ka la aiti da ka dorkhas sha u Myntri ka tnat Pule puthi ka Sorkar Pdeng u Dharmendra Pradhan ban pynpaw ka jingduh jingshaniah halor ka rukom treikam u Vice Chancellor (VC) ka skulbah NEHU u Prof PS Shukla.

Haba kylli u Bah Hek u la ong ba kumba paw, jan baroh kiba don bynta hapoh ka skulbah NEHU ki dawa wengkam ïa u VC u Prof PS Shukla bad ïa kane ka jingdawa ki kynhun ka NEHU naduh ka NEHUS, KSU NEHU, MeTTA, NEHUTA, ki nongtrei bad ki Nonghikai kila pynpaw sha ka Committee haka por ba ka don jingïalang hapoh ka skulbah. “Lada ka kaiphod jong ka Committee ka long kumba pynpaw ki kynhun ka NEHU, kan bha ban weng ïa u VC namar lada u juh u briew u shimti biang kum u khliehduh ka NEHU, ki kam ki jam kin ym iaid beit shuh hapoh kane ka skulbah” u la ong.