Dawa ki Nonghikai SSA ban thaw ‘Empowered Committee’

Ki Nonghikai SSA ha ka Jylla ki la dawa ban thaw da ka Empowered Committee ban bishar bniah ia ki mat jingdawa jong ki. Kane ka sur ka la mih hadien ka jingialang ka General Meeting ki nonghikai hapoh ka shatri jong ka Meghalaya SSA Schools’ Association (MSSASA) kaba la long ha Madan Student Jaiaw, Shillong. Haba kren sha ki lad pathai khubor hadien ka jingialang u president ka MSSASA u Bah Aristotle Rymbai u la ong, nalor ban thaw ia ka Empowered Committee, ki nonghikai ki la pynbna ban weng noh shwa ia ki program iakhih bad ban bteng ia ka jingiakren bad ka Sorkar Jylla.  U Bah Aristotle ula ong, ha ka Empower Committee dei ban don ki ophisar na ka tnat Law, Personnel, Finance, Education Departments bad ki Nonghikai SSA na ka Jylla.

Ula iathuh ha ka 17 tarik mynta u bnai, ka Sorkar Jylla ka la khot iakren biang ia ki Nonghikai SSA halor ki mat jingdawa.”Ha kane ka jingialang ngin pynsngew biang sha ka Sorkar Jylla ba dei ban pyllait ia ki Nonghikai SSA ba sdang trei ha lane shwa 1 tarik Naitung, 2020 ban iakhun ia ka eksamin MTET” la ong u Bah Aristotle. Ha kajuh ka por, u Myntri tnat Pule u Rakkam A Sangma halor ka jingdawa ki Nonghikai SSA ban thaw da ka Empowered Committee ula ong ba kam donkam namar ka la don ia ka State Education Commission (SEC) ban peit ia ka Pule Puthi hapoh ka Jylla. “Ngi la don ka State Education Commission ban peit bniah ia ka Pule Puthi ha Jylla, la ka dei ia ki Nonghikai SSA, ki skul, ki College. Ka SEC ka dang pynkhreh ia ka kaiphod bad kan sa ai ti sha ka Sorkar Jylla ban shim ia ki lad ki lynti” la ong u Rakkam.

U bynrap kan long kumjuh lada thaw ne ym thaw Empowered Committee kumba dawa ki Nonghikai SSA namar kin dei ki juh ki Ophisar, u juh u Myntri Rangbah ne u juh u Myntri ban don ha kata ka Committee kiba la tip lut halor ki jingdawa jong ki”. U Rakkam u la kubur ba ka jingduna ka pla tyngka ka Jylla ka dei kawei ka daw bah ba ka Sorkar kam lah ban shu rai kyrkieh halor ka jingdawa ki Nonghikai SSA. “Hynrei ngi dang iai wad ia ki lad ki lynti ban pynrulong ia ki jingdawa jing ki” ula bynrap.