Ban rat dkhong ïa u Drok, plie u MR ia ka Police Station ANTF

Ka Meghalaya ka dei ka Jylla ba nyngkongeh hapoh ka thaiñ shatei lammihngi (North East) ban don Police Station ba kyrpang, na ka bynta ban iakhun pyrshah ïa u drok hapoh ka Jylla. Kane ka wan hadien ba u Myntri Rangbah ka Jylla u Conrad K Sangma hynne ka sngi u la plie paidbah ia ka Anti Narcotics Task Force (ANTF) Police Station ha Golf Link Shillong.Kane ka Police Station jong ka ANTF kan treikam lang naka ophis treikam jong ka MPRO Office Building, Golf Link, Shillong. Ka Police Station jong ka ANTF kan don palat 30 ngut ki Pulit ha kaba la ialam da u Superintendent of Police (SP) ANTF, Additional SP, Inspector, 4 ngut ki Sub Inspector, 23 ngut ki Constable bad 1 Follower. Haba kren ha kane ka sngi u Conrad u la ong ba kane ka sngi kadei ka sngi ban sah jingkynmaw ia ka tnat Police bad ia ka Sorkar namar iaka Police Station la thaw khnang ban iakhun ban rat dkhong ïa u Drok napoh ka Jylla Meghalaya.

“Kane ka Police Station ka lah ban i rit hynrei ka jingtreikam jong ka ha ka jingiakhun lane ka thma pyrshah ia u droks kan long kaba khraw bha” u la ong. U Conrad u la ai ka jingiaroh ia u Symbud Myntri Rangbah u Bah Prestone Tynsong, ia ka DGP Kong Idashisha Nongrang bad ia u Superintendent of Police (ANTF) Jagpal Singh Dhanoa, kiba la pynthikna ia ka jingpyndep ban plie ia kane ka Police Station hashuwa ka Khristmas, kaba dei ka thong bala buh da ka Sorkar. U la ong ba kane ka dei ka thma kaba ym lah ban iakhun tang da kawei ka tnad treikam hynrei ka donkam ka jingdon bynta lang jong ki Pulit, ka Tnad ka Koit ka Khiah bad ka Tnad Social Welfare haba ban jur ia ka jingiatreilang jong ki Dorbar Shnong, ki Nongialam Shnong bad ki Nongshongshnong ban iasnohkti lang ha ka jingiakhun.

“Kane ka dei ruh ka khyllipmat kaba kongsan bha ia nga ban kyntu ia baroh ki nongshongshnong, ban kyntu ia baroh ki nongialam jong ngi, ban kyntu ia baroh ki Shnong ba lada ngi dei ban jop ia kane ka thma pyrshah ia u droks, ngi donkam ban iatreilang. Ngi dei ban kyrshan markylliang” ong u Conrad haba kular ba ka Sorkar Jylla kan pynbiang lut ia baroh ki jingdonkam, ka jingkyrshan pisa, bad ka jingiatreilang. U Conrad ula pynpaw ba kane ka Police Station kan trei borbah ha kaban tehlakam ia ka jingshalan droks bad ka jingpyniaid iew, ka bynta kaba kongsan eh na ki buit iakhun pyrshah droks jong ka Sorkar. Kiba la iadonlang ha kane ka sngi ki kynthup ia u Symbud Myntri Rangbah Bah Prestone Tynsong, Myntri ka Tnad Social Welfare Bah Paul Lyngdoh, Myntri ka Tnad ka Koit ka Khiah Kong Ampareen Lyngdoh, ka DGP bad ki heh Ophis ka Jylla.