Ka jingai tiket ia u MDC ba mynta ka dei hadien ba la bishar : Ardent

Ha ka jingialang pynithuh paidbah ka Voice of the People Party ia ki 29 ngut ki kyrtong MDC ka JHADC kaba la pynlong mynta ka sngi 18/12/24 ha Iawmusiang Jowai, u President jong ka u Ardent Miller Basaiawmoit ula pynshai  halor ka jingai tiket ka VPP ia u MDC ba mynta u Awhai Andrew Shullai ban na Jowai North, da kaba ong ba ka jingai tiket ia une u  MDC ba mynta dei hadien ba la dep bishar bniah bad tynjuh ia ka jingmut jingpyrkhat jong u.”Bad ruh ba ki nongialam VPP ki sngewthuh ba une u kyrtong u iohi ba mynta donkam ban leit sha u paidbah tang da ka lynti ka VPP  bad ruh dei tang da kane ka lynti ba khuid ba beit lada dang dei ia nga ban shakri paidbah, Kata dei ka jingkren une u  MDC ba mynta ba la ai tiket ka VPP” ong u Ardent Miller Basaiawmoit.

Ym dei ba la shu ai matlah bad ba u suk ban jop. Shuh shuh u ong haka jingleit shaki paidbah ymdon uwei ruh naki nongialam ka party ba ong ban sei kyrtong tang da kiba dang thymmai, ym don ruh ba ong ba yn ym ai tiket ia kiba la long nongmihkhmat, hynrei haba ngi ong ban sei da kiba fresh ka mut da ki briew ba dang biang, dang khuid bad sei ki briew ba dang thymmai.

Bad naka bynta kiwei pat ki kyrtong VPP ruh u ong, kane hi ka juh ka rukom la ai tiket da  kaba bishar bniah nadong shadong. Ha kane ka sngi u Ardent ula pyntip ruh ba kine ki kyrtong kin ym lah ban leit sha ki paidbah da ka mon lajong ne jingsngewthuh la de, hynrei ki dei ban rah da ki mat siañ pyrkhat ba ka party ka la buh.