Bthah ka High Court ban ai ti jaka pynheh kad liengsuin hapoh lai sha ka AAI

Ka Iingbishar ka Meghalaya High Court ka la btah ia ka sorkar jylla ban shim ki lad ki lynti, khnang ba ka jaka ba donkam ban pynheh ia ka kad liengsuin bad kiwei ki jingtei ba donkam yn ioh ban ai ti sha ka Airport Authority of India hapoh lai bnai naduh ka tarik ba pynmih ia kane ka hukum.“Ngi bthah ia u Director General ka Civil Aviation ryngkat jingiatreilang bad Airports Authority of India ban mynjur bad pyntreikam ia ka plan ba pura, ban pynheh ia ka kad liengsuin bad kiwei ki jintei hapoh lai bnai naduh ba la ai ti ia ka jaka sha ka AAI.Ia kane ka mukotduam yn bishar biang ha ka 14 tarik u Iaiong, 2025 ban pyrkhat ia ka sien jam ba la leh da ki nongshah mudui. Ka long kaba donkam ban pynrung ha ka kaiphod ban ai ti sha bor jong ka AAI.

Kham shwa ka iing bishar ka la pynpaw ba ka jingpynheh ïa ka Kad Liengsuiñ Shillong ka long u shabi ban kyntiew ïa kane ka Jylla ha ki liang baroh. Ka lah ban pynsuk ia ka jingiaid liengsuiñ ba kham heh ban kit. Ia ki nongleit nongwan bad ban kit mar ki mata. Kane kan kyntiew ia ka ioh ka kot bad ka kam jngohkai pyrthei ha ka Jylla Meghalaya.U Learned Advocate General u pynpaw ba la shim ia ki lad ki lynti ban shim ka jaka kaba donkam ban pynheh ia ka kad liengsuin bad kiwei ki jingtei, hynrei haduh mynta ym pat lah ban aiti ia ka jaka sha ka sha ka AAI.

Kumjuh u Bah P. U Yobin, u pynpaw ba dei ban pyndep kloi ia ka jingtei pynheh ia ka kad liengsuin bad dei ban pyntip ia u Director General jong ka Civil Aviation. Halor kane, u Dr. N. Mozika u pynpaw ba ka Directorate of Civil Aviation ka trei lang bad ka AAI bad ym donkam ban ai jingtip kyrpang.