Ujor sha Home Ministry ba byrngem ka KSP, ong u Bah Titos

U Chief Executive Member (CEM) ka KHADC u Bah Pyniaid Sing Syiem ula pyntip ba ka District Council ka la pynskhem ia ka rai ka Dorbar Shnong Mawsynram ban ym shah lehniam hapoh ka Krem Mawjymbuin. Ia kane u Bah Pyniaid ula pyntip haba jubab ia ka Zero Hour Notice ba la wanrah da u MDC ka Nongpoh u Bah Balajied Ranee halor ka jingbyrngem pakhang surok ka Seng Kutumba Suraksha Parishad (KSP) lada ym shah ban lehniam ha krem Mawjembuin ha Mawsynram. Haba pynpaw ka jingpyrshah ia ka Seng KSP, u Bah Pyniaid ula ong ba ka kane ka mat kwah lehniam ha krem Mawjymbuin ka dang don hapoh ka Meghalaya High Court bad ka iingkashari ruh ka la dep ban bthah ia ka ophis deputy commissioner (DC) ban thaw da ka Committee ban pynbeit ia kane.

“Kane ka jingbyrngem ka KSP ka long pyrshah ia ka iingkashari lane Contempt of Court bad kane la long beain namar kane ka jingbyrngem jong ki ka lah ban wanrah ka jingiakynnad hapdeng ki paidbah ka Meghalaya bad Assam lada pakhang surok” la ong u Bah Pyniaid. U CEM ula kyntu ruh ia ka Sorkar Jylla ban shimkhia halor kane bad ban pynkhlain ki bor pahara khnang ba ki paidbah kin nym shah ktah na ka jingbyrngem ka KSP. Haba shim bynta ha ka Zero Hour Notice u Nongialam ka Liangpyrshah u Bah Titos W Chyne ula ong ba ka District Council ka dei ban thoh sha ka tnat Home Ministry halor ka jingbyrngem ka Seng Hindu ban pakhang surok lada ym shah ban wan lehniam hapoh ka Krem Mawjembuin ha Mawsynram. U Bah Titos ula ong ba kane ka jingbyrngem ka Seng Hindu na Assam kam dei tang ka jingshah byrngem ka Sorkar Jylla hynrei ka dei ka jingbyrngem lang ia ka Dorbar Shnong bad Hima Mawsynram, ka KHADC bad ki paidbah nongshong shnong ka Meghalaya baroh kawei.

U la ong ba KHADC kaba dei ka nongiada ia ka khyndew ka shyiap ha Rilum Khasi ka dei ban shim ka jingkitkhlieh halor kane ka jingbyrngem ka Seng Hindu na Assam. “Ngi dei ban pynrem jur ia kane ka jingbyrngem ka Seng Hindu kaba ki la dawa ban shah leh niam ha krem Mawjembuin. Ngi dei ban kren shai ha kane ka Seng ba kane ka krem ka don ha ka jaka kaba dang hap hapoh ka khyrnit ba hynriew bad ka dei ka jaka ba la ri bad sumar da ka Dorbar Shnong Mawsynram” la ong u Bah Titos. Haba pynpaw ba ka Ri India ka dei ka ri ba laitluid ban lehniam, u Bah Titos u la ong “Ngam pyrshah ia kano kano ka jingleh niam hynrei kane ka krem kam dei ka jaka lehniam bad kam don kano kano ka sakhi sabut ba kane ka krem ka dei ba la leh niam da ki riewngeit Hindi da ki spah smem kumba la kam kane ka Seng”.