Daiñ kuna ka MSPCB ïa ka Star Cement ba pynkheiñ kyndon aiñ

Ka Meghalaya State Pollution Control Board (MSPCB) ka la dain kuna T.1.20 lak ia ka M/s Star Cement Limited, Lumshnong ha East Jaintia Hills District halor ka jingpynkhein ia ka Water and Air (Prevention and Control of Pollution) Acts 1974 bad 1981 bad la ai por 7 sngi ia kane ka karkhana ban jubab ia ka Show Cause Notice. Katkum ka shithi ba la phah da u Member Secretary ka MSPCB u Dr G.H. Chyrmang sha ka Star Cement ha ka 19 tarik u Nohprah ula ong, “Mynta, haba peit ia kitei kiba la kdew haneng, ka Meghalaya State Pollution Control Board katkum ka bor ba la pynkup lyngba ka Section 33A ka Water (Prevention and Control of Pollution) Act, 1974 bad Section 31A jong ka Air (Prevention and Control of Pollution) Act, 1981, kumta kan hab ban siew kuna T.1,20,000 kum ka bai lutksan pynjulor ia ka mariang (Environmental Compensation) katkum ki kyndonka Central Pollution Control Board na bynta ka Assessing Environmental Compensation ba la pyntreikam da ka Meghalaya State Pollution Control Board,”.

U Member Secretary ula pynpaw ia ka Environmental Compensation dei ban siew hapoh ka 15 sngi naduh ka sngi ba la ïoh pdiang ïa ka jingbthah lyngba ka Demand Draft ne ka Banker’s Check kaba lah ban sei da u Member Secretary ka Meghalaya State Pollution Control Board, Shillong bad lada ka Unit kam lah ban pyndep ïa katei ka jingbthah ba la kdew haneng, ka Meghalaya State Pollution Control Board kan hap ban shim da ki kiwei ki lad ban sdang ïa ka jingtohkit pyrshah ïa ka Unit, katkum ki kyndon ain. Nalor kane, ka MSPCB ka la ai Show Cause Notice ia ka karkhana halor ka jingpynkhein ia ki kyndon ka Consent to Operate.  “La pyntip da ka Notis sha kane ka ophis ha ka 19 tarik u Nohprah 2024 ba ka M/s Star Cement Limited kala pynkheiñ ïa ki kyndon jong ka Consent to Operate bad ki jingpynmih ïa ki lyer jakhlia na ka Unit naduh ka 16 tarik u Nohprah” bad ka bynrap “Haba, ka M/s Star Cement Limited kala pynkheiñ khnang ïa ka Section 21 jong ka Air (Prevention & Control of PollutIon) Act, 1981 bad Section 25 & 26 jong ka Water (Prevention and Control of Pollution) Act, 1974 bad ia ki kyndon jong ka Consent to Operate jong ka Board” la pynpaw ka MSPCB.

Ka jingpynsajia ia katei ka karkhana pynmih dew bilat kadei hadien ka jingioh pdiang ia ka jingujor ia ka jingpynkhein ia ki kyndon jong ka Consent to Operate bad ka jingpyllait ia ki lyer jakhlia jong ka Unit naduh ka 16 tarik u Nohprah bad la shem ruh ba ka Online Continuous Emission Monitoring Systems (0CEMS) kam shym la treikam bad kala long Offline. “Ka CPCB ka lah ban pynshitom halor ka jingulom lada ka don, pyrshah ia kito kiba don ka jingkitkhlieh ban buh bad pyniaid ia ki STP, CETP bad ETP. Ka CPCB ka lah ruh ban khmih bniah bad ban shim ia ka bai lutksan halor ka jingpynjulor ia ka mariang bad ia katei ka pisa lah ban buh ha kawei pat ka Account bad ban pyndonkam na ka bynta ban leh ia ki kam ban iada ia ka mariang. Dei ban pynkhreh ia ki mat treikam da ka CPCB hapoh jong ka 3 bnai”.Ka NGT ha ka hukum ba la pynmih ha ka 10 tarik u Naitung 2019 ka la ong ruh, “Ka CPCB kan buh kyrdan ia ki karkhana katkum ka jingjaboh ka jong ki” bad ki SPCB bad ka CPCB ki lah ban shim ia kino kino ki sienjam kynthup ban ioh biang ia ka bai lutksan halor ka jingpynjot ia ka mariang halor ka nongrim jongka ‘Polluter Pays’ bad ruh ban shim ia ki lad jingiada katkum ka nongrim jong ka jingiada.