Sam jingiarap u Rupang ia 6 ki longiing baduk

Ka Shlem sam jingiarap kiba duk u Rupang mynta ka sngi ha ka sien ba khadlai ka la lah ban sam jingiarap sha ki Hynriew tylli ki longiing ba duk ba jynjar kiba la jied na kylleng ki shnong ka Ri Khasi-Jaintia. Ia kane ka jingsam jingiarap la pynlong ha Mawkhar Chistian Higher Secondary School,Shillong ha ryngkat ka jingiadonlang  kiba ha iing ha sem,ki nongnoh synniang bad ki katto katne ki riew rangbah bad longkmie  kiba ju don bad noh mynsiem lem ia kiba duk ba jynjar. Kine ki longiing ki la ioh jingiarap da ki tiar khnang ban ioh pyndonkam ha iing ha sem kum ki tusok, ki blanket bad ki tiar shet tiar tiew ban ioh  pyndonkam ha iing ha sem. Ka jingmih pisa mynta u snem na kiba noh synniang ka la poi T.35 hajar baroh. Ki hynriew ngut ki longiing kiba ioh jingiarap mynta u snem 2024, ki kynthup ka  kong Aipor Syiemiong na Laitlyngkhoi, kong Wetira Nongphud na Nongumlong mawkynjang, kong Daring Ryntathiang na Umsaitsning Nongpdeng,Ri Bhoi District, Kong Sikir Jana na Mawmaram, Kong Royalty Lamurong na Kyndong Tuber bad kong Phriwel Khaya na Musniang, East Jaintia Hills.

Ha kane ka sngi la wan sakhi lang da i sister  B. Lyngdoh iba dei i nongpyniaid jong ka Mercy Home, Nongthymmai ka jaka ba peit ia ki briew ba la tymmen. Ka sister Lyngdoh haba kren ha kane ka sngi, ka la pynpaw ia ka jingsngew kmen ba kane ka kynhun sam jingiarap ka la lah ban noh synniang sha ki longiing kiba duk kiba donkam shisha ia ka jingiarap. Ka sister Lyngdoh ka la ong ba khlem ka jingieit ym lah ban leh ia kino kino ki kam namarkata, ka jingieit ka hap ban wan hakhmat shwa. Ka la kyntu ia kiba ioh jingiarap ba ki dei ban pyndonkam hok ia ki tiar ba ki ioh bad ki dei ban pyndonkam da ka jingieit khnang ba kan long kum ka jingkyrkhu ia ki.

Ka la ai mynsiem ia kane ka kynhun ba kin nangiai trei na bynta ka bha ka miat lang jong baroh.Ha kane ka sngi la donlang u Secretary ka Shlem sam jingiarap u Babu Kular Khongjirem, ki ba haiing hasem nalor ki nongnoh synniang sha kane ka shlem jingiarap baduk.