Sei ka HSPDP da ka khun pyrsa u Maieit Hoping

Ka kong Badariti Lyngdoh Nonglait, kaba dei ka khun pyrsa jong u (L) Hopingstone Lyngdoh, u nongseng  ia ka Hills State People’s Democratic Party (HSPDP), ka la pynbna bad pynithuh hakhnat jong ki paidbah ha iew Nongstoin ba kan iakhun ia ka elekshon MDC na Nongstoin Constituency.  Kum ban shu pynkynmaw ba u Maieit Hopingstone Lyngdoh u dei uwei na ki rangbah uba la pawbha ha ka kam sain pyrthei, uba la shakri kum u MLA la palat 43 snem, shi samoi kum u MP ha Lok Sabha, bad u MDC haduh hynñiew sien. U Maieit Hopingstone u la ioh bha ia ka jingshaniah na ki paidbah ka Nongstoin bad u la jop lynter ha ka jingiakhun ban long kum u MLA haduh ki sngi jingiap jong u.

Ka kong Badariti ka la kular ba kan bteng ban bud ia ki dienjat jong u kñi jong ka bad ban pyndep ia ki kam sahteng bad ban ai ka jingkitkhlieh kumba la ialam da u kñi jong ka halor ka bha ka miat jong ki paidbah ka Nongstoin. Ka la pynpaw ruh ba ki mat ba kongsan ba kan shim lada ka poi sha ka thong ka long ban pynkhlain ia ka District Council, ban pynkylla ia ka Paragraph 12 A jong ka Sixth Schedule jong ka Riti Synshar, ban pynneh pynskhem ia ka riti rukom ai jait kmie, ban ieng pyrshah ia ka jingwanrah ia ka Uniform Civil Code, ban weng ia ki jingeh ha ki jaka khappud bad kiwei kiwei.

Ka la ong ba “u Maieit u ju ong ba lada ki paidbah kim thep ia u, ki angel kin wan ban thep bad kyrshan ia u, bad ha kane ka jingwad bniah ka la lap ba kine ki angel kiba ju kyrshan radbah ia u, ki dei ki riew tymmen, ki duk ki suk bad ki kup shilliang ki sem shilliang, kumta ka la kyntu ia ki angel jong u Maieit ryngkat bad ki paidbah ba kin ai jingkyrshan biang ia ka party HSPDP ha kane ka kynti bad ka la kular ruh ban kan ialeh ban pyrthuh bud ia ki dienjat jong u kñi jongka bad ban pynurlong ia ki jingangnud ba la slem jong u.Ha katei ka sngi la ioh jingkren ruh na u General Secretary ka HSPDP sengkmie u Bah Panborlang L. Ryntathiang, u samla Pynshai Joel Dkhar, Secretary HSPDP Youth Wing, u samla Wellesly Lyngkhoi, Secretary Youth Wing jong ka West Khasi Hills District uba la pynïaid ruh ïa ka jingïalang ha katei ka sngi bad kiwei kiwei..