Lap ki nongrep na Jylla ia ki jait sying bad rukom ri ngap phylla ha Kerala

Ka kynhun ki nongrep na Meghalaya dang shen ki la wan phai na ka jingleit shah hikai sha ka Jylla Kerala bad ki la shem bun jait ki sying bad ki la ioh ia ki buit thymmai ban ri ngap. “Ngim shym la tip ia ki jait sying bapher bapher ba don tad haduh ba ngin da leit jngoh hi sha Kerala” la ong u Banskhem Lang Kharmuti, General Secretary ka seng Khasi-Jaintia Farmers’ Association (KJFA). U Bah Banskhem u la long shibynta na ka kynhun jong ki nongrep na Meghalaya kiba don 25 ngut ki dkhot kiba la leit ban ïashim bynta ha ka jingai jinghikai bad ka jingleit pynpaw pyrthei halor ka kam meliponiculture bad apiculture ha Kerala ïa kaba la pynlong daka Meghalaya Farmers’ Empowerment Commission ka Sorkar Meghalaya naduh 17 tarik haduh 24 tarik Naiwieng 2024.

Ha kane ka jingleit jngoh jong ki, ki nongrep ki la lap ia ki jait sying ba thymmai, kiba kynthup u Kanchipuram Ginger, Erode Ginger, bad Cuddalore Ginger kib rep hapoh ka Jylla Tamil Nadu.”Kine ki jait ki pawnam namar ka jingdon umphniang kaba bun, ka jingbha bad ka jingsma kaba kyrpang” u la ong. U Bah Banskhem u la ong ruh ba ka jinglong jingman jong ki nongrep ha Kerala ka long kaba kham heh shibun ban ia kiba ha Meghalaya. U la pynshong nongrim ia kane ha ka jingsuki ban pynpoi ia ki jingtip sha ki nongrep ha Meghalaya. “Ka Sorkar ka pynbna ia ki skhim na ka bynta ki nongrep, hynrei ha ka por ba ki jingtip ki poi sha ngi, bunsien ka la kham slem” u la kdew.

Ka jingleit ki Nongrep sha Kerala ka kynthup ruh ia ka jinghikai shaphang ki buit ri ngap, kaba ki nongrep ki shem ba ka long kaba myntoi shibun. “Ngi la ïoh jinghikai shaphang ka jingdonkam jong ka jingri ngap bad kumno ka lah ban pynbha ïa ka jingmih jong ki jingthung” u la ong. Kane ka jingleit ka la ai mynsiem ïa Bah Banskhem bad ïa ki para nongrep jong u ban shim ïa ki rukom rep kiba thymmai bad ban wad ïa ki lad ki lynti jong ka jingrep sying bad ka jingri ngap ha Meghalaya. “Ngin sa pyrshang thikna ban rep ia kine ki jait ha ka Jylla jong ngi bad peit kumno ki treikam” u la ong.