kynran dien ka KHNAM ha JHADC, kam ba ka Party kam pat suhthied bha

Watla ka Jylla kan sakhi iaki 2 tylli ki ilekshon MDC kata sha ka Khasi Hills Hills Autonomous District Council (KHADC) bad Jaiñtia Hills Autonomous District Council (JHADC), hynrei ka Khun Hynniewtrep National Awakening Movement (KHNAM) hynne ka sngi kala pynbna ban nym ai tiket ia ki kyrtong kiba kwah ban iakhun ia ka ilekshon MDC sha JHADC. Ïa kane ka rai la pynbna da u General Secretary ka KHNAM u Bah James MA Neng hadien ba la wai ka jingialang kaba la long ha nongbah Shillong. Haba kren sha ki lad pathai khubor u Bah James u la iathuh ba ka daw baka KHNAM kam treh ban pynieng kyrtong shaka ilekshon MDC na JHADC kadei namar ba ki paidbah ha rilum Jaintia kim pat da sngewthuh bha ia ki nongrim jong ka Party.

“Ha Jaintia Hills kumba 4-5 ngut ki riewrangbah kiba la wan shakhmat ban pan Ticket naka KHNAM hynrei katkum ka jingpeit jong ka Seng, ngi sngewba ha rilum Jaiñtia ka seng jong ngi kam pat suhthied bha lehse ki paidbah kim pat sngewthuh bha ia kane ka Party” la ong u Bah James. Haba kyntu iaki paidbah ka rilum Jaintia, u Bah James u la ong “Da kaba burom ia ki paidbah ka rilum Jaiñtia, ba kin ym sngew eiei ha kane ka por ba ngin ym lah ban ai tiket iano iano ruh ha kane ka kynti ba mynta”. U Bah James u la pynksan baka nongrim jong ka KHNAM ka log ban kyntiew, ban ialam bad ban iada ia ka Ri bad ka jaidbynriew.

“Ka KHNAM ka sngew ba ka ilekshon MDC ka dei kaba kham kongsan na kiwei pat ki ilekshon namarba kane ka ktah beit ia ka Ri bad ka jaidbynriew, ka ktah beit ia ki paradoh parasnam jong ngi namar ba dei lyngba ka Autonomous District ngi lah ban pynneh pynsah ia ka jinglong ba kyrpang jong ka Ri bad ka jaidbynriew” u la bynrap.