Sha kiba duk yn ai u Bah PT Sawkmie ïa ka tulop MDC

U Bah PT Sawkmie, MLA barim u pynpaw, ba da ka jingisynei jong U Blei, lada u jop kum u MDC ha kane ka ilekshon kaban wan, ka tulop jong u un ai lut sha kiba duk basuk ka Mawlai Konstitwensi. U bah Sawkmie u pynpaw ia kane haba sdang ia ka jingialap ia ka ilekshon MDC jong u kaban long ha ka 21 tarik u Rymphang, 2025.“Ngan buh kyrpang ia kane ka tulop jong nga na ka bynta ki paidbah kiba duk kiba suk, kiba jynjar bad kiwei kiwei,”ong u bah Sawkmie shuwa ban iaid ialap ia ka ilekshon MDC ha Mawlai.

U pynpaw ba ka jingmang jong u ia kane ka tulop ka long ba ki paidbah ka Mawlai Konstitwensi kin shngain, lada ki wan iakynduh ia u ha ka por ba ki shitom ki shipa bad ba kin shlur ban pyntip sha u, haba ki la tip ba ka tulop ka dei kaba u la buh na ka bynta jong ki.Ha kane ka sngi u bah Sawkmie u la pyntikna ruh ba un iakhun kum u kyrtong shimet ha kane ka ilekshon MDC. Ha kane ka sngi u bah Sawkmie u la iaid ban pan ia ka jingkyrshan da ka jingsngewrit na ki paidbah nong Mawlai kaba u la iaid ha kylleng ki jaka ha Mawlai, ia kaba u la pan ia ka jngkyrshan na kiba shong dukan, ki driver taksi, driver autu, ki nongbylla, na ki nongsait jain bad na ki paidbah ba bun balang jong ka konstitwensi.

Ha kane ka sngi la ioh ruh ia ka jingkren na ki longkmie bad longkpa, kiba kyrpad sngewrit ia ki paidbah nong Mawlai ba kin kyrshan ia I ha kane ka ilekshon MDC. Ka ilekshon sha ka KHADC kan long ha ka 21 tarik bad ka jingniew vote kan long ha ka 24 tarik u Rymphang, 2025.