Pan jingkyrshan u MP ia u kyrtong MDC ka VPP na Jirang

Ka Pyrty Voice of the People Party ka la pynlong jingialang ha shnong Nongrim Jirang, Ri Bhoi District ha ka 3 tarik mynta u bnai ban pan jingkyrshan na ki paidbah ia u kyrtong MDC u bah Apkyrmen Lyngdoh Nonglait u ban iakhun ia ka ilekshon MDC ka ban long ha ka 21 tarik Rymphang mynta u snem. Ha ba kren ha ka jingialang u Dr Ricky AJ Syngkon uba long ruh u MP ka Shillong seat ula ong, ba ka jylla Meghalaya ka la hiar arsut ha ka liang baroh naduh ka pule puthi ka synshar khadar bad kiwei kumta ka VPP ka wan ban pan jingkyrshan na ki paidbah ban wanrah ia ka jingkylla ha ka synshar khadar kaba khuid bad ka bym noh Shiliang.

Ula ong ka District Council ka dei ka nongiada ia ka khyndew ka shyiap bad ka riti dustur bad ngi donkam ban pynkhlain ia ka District Council na bynta ka lawei jong ka Ri. Ula bynrap ba ka VPP ka ieng ha ka Nongrim ba skhem ban wanrah ia ka synshar khadar kaba khuid bad ka bym noh Shiliang ia ki paidbah. Ula ong wat la ka VPP ka don tang 4 ngut ki MLA ha Jylla hynrei ka don ka jingshngain ia ki paidbah bad kumba phi la kyrshan ban pynjop don burom ha ka ilekshon MP nga kyrmen ba phin kyrshan biang ia u kyrtong MDC ka VPP u bah Apkyrmen Lyngdoh Nonglait ban poi sha ka thong jingjop na bynta ban wanrah ia ka jingkylla ha ka synshar khaddar naduh ka District council ki hima haduh ki shnong ki thaw.

Shwa kane la ioh ka jingkren na u bah Apkyrmen Lyngdoh Nonglait  ban pan jingkyrshan na ki paidbah ha kane ka ilekshon MDC khnang ba unpoi sha ka thong ka jingjop. Ia ka jingialang la pyniaid da u bah Wesly Doloi bad la ioh ka jingkren ai khblei na u Pastor LS Thangkiew.