Kiew 2,269,512 ki nongthep Vote ha MeghalayaBun ki kynthei ia ki shynrang, 6 ngut ki ‘Third Gender’

Ka jingdon ki nongthep Vote hapoh Meghalaya ka la kiew da 29,013 ngut katkum ka Final Electoral Roll 2025 bad baroh ki Nongthep Vote hapoh ka Jylla ka long 2,269,512 ngut. Ïa kane la pyntip da u Chief Electoral Officer (CEO) ka Jylla u Dr BDR Tiwari bad ula ong ruh ba na ki 2,269,512 ki nongthep vote, 1,118,907 ngut ki dei ki shynrang, 1,150,599 ki kynthei bad 6 ngut ki Third Gender. U Dr BDR Tiwari u la pynbna ba la pyndep ia ka Special Summary Revision ha ka 1 tarik Kyllalyngkot 2025 bad la pyndep ia kane ka kam da kaba iaid bin pa bin ban pynthikna ia ka jingpynbeit ryntih bad ka jingkynthup ia baroh ha ka electoral roll. U la ïathuh ba ha ka Electoral Roll ki don 72,941 ngut ki nongthep vote kiba dei ki khynnah. ha ka rta kaba 18-19 snem, 10,398 ngut ki nongthep vote kiba la noh ka rta bad 11,960 ngut ki briew kiba don ki jingduna ha ki dkhot met.

U Dr BDR Tiwari u la batai shaphang ka jingiaid ha ki ar rukom ia ka jingpynthymmai ia ka thup kyrteng jong ki nongthep vote ha ka jylla. Ha kaba ia ka pre-revision phase la sdang naduh ka 20 tarik u Nailar haduh ka 18 tarik u Risaw da kaba leit pynthikna na man la ki iing, ki jaka thep  vote bad ban pynbeit ia kino kino ki jingbakla ne jingduna. Ka Revision Phase kala sdang da ka jingpynmih ia ka Draft Electoral Roll ha ka 29 tarik u Risaw 2024, ha kaba la ailad ia ki nongshong shnong ban kam ne pyrshah ‘claims and objections’ haduh ka 28 tarik u Naiwieng bad la pynlong ruh ia ka Special campaign ban pynshlur ia ka jingashimbynta bad ia baroh ki jingkam la pynbeit hapoh ka 24 tarik u Nohprah. Ban pynbiang ia ka jingpynrung ia ki nongthep vote kiba thymmai, kumta la kyntiew noh ia ka jingdon jong ki jaka thep vote na ka 3511 sha ka 3512 bad ka jylla ka la lah ruh ban pynurlong 100% ia ka jingai ia ki EPIC kaba pyni ia ka jingskhem jingmut ha ka rukom treikam.

U Dr Tiwari ula iaroh ia ka jingshimkhia jong baroh ki seng sain pyrthei bad ki nongshong shnong ha ka ban pynthikna ia ka jingiaid beit ha ka jingpynrung kyrteng ia ki nongthep vote. U la ban jur ia ka jingkongsan ban bteng ia kane ka rukom iatreilang bad ula pynpaw ia ka jingling kongsan ruh jong ki rynsan kum ka ECI Portal bad Voter Helpline Mobile App ki ban kyntiew ia ka jingioh jingtip jong ki nongthep vote.