Khylliap lama ka UCPF ban kyrshan ia u kyrtong Congress ha Umroi

Hadien ka jingiamir jingmut lang para nongialam ryngkat ki nongkyrshan ka kynhun jong ka Umroi Constituency Progressive Forum’s (UCPF) ha ka General Meeting mynta ka sngi ha shnong Umdohbyrthih, ki shim ka rai ban khylliap lama ia ka UCPF bad ban ai jingkyrshan ia u kyrtong ka Congress u Bah MD Syiem ha kane ka ilekshon MDC ka ban long ha ka 21 tarik u Rymphang ha KHADC. Ha kane ka General Meeting jong ka UCPF, ha kaba la rai ban khylliap noh ia ka lama ban leit kyrshan noh ia ka party Congress la lamkhmat da u President u Bah Pynskhemlang Sohtun, u Bah Remius Kharsati, Vice-President, u Bah Forstar Sohiong, Bah O. Masharing, Bah Hilarious Mukhim, General Secretary Bah PS Jana, Adviser Bah F. Marwein, ka Kong IBashanti Lamarai, Executive Members nalor kiwei ki nongkitkam ha ryngkat ki spah ngut ki paid nongkyrshan ka kynhun. Haba pynshai sha ki paidbah halor ka rai ban khylliap noh ia ka lama jong ka UCPF, na ka liang u Bah Pynskhemlang Sohtun ula iathuh, ba kum ka kynhun hi ka la rai ban khylliap noh ia ka lama bad ban leit ai jingkyrshan noh ia u Bah MD Syiem u ba dei hi u wei na ki dkhot ba la ioh ia ka tiket jong ka party Congress ka long hadien ba la ia shong pyrkhat ha ki ar ne lai tylli ki jingialang namar ba kum ka kynhun hi kim kwah ba ki nongkyrshan kin sah ha ka umdum hadien ba u jop ia kane ka ileksion MDC 2025.

 “Kumba la don lypa ka jingiakut ban leit pyniasoh noh sha ka party Congress, hadien ba u kyrtong jong ka Forum u la ioh ia ka tiket ban aireng ia ka ileksion MDC na ka party Congress, khyndiat ban maitphang ha kaba ia dei bad ka jingioh tiket na ka party Congress ia u Bah MD Syiem u ba dei u kyrtong na ka Forum kata hadien ba ka Committee jong ka Forum ka la bthah ia u ban thep kyrteng noh na bynta ka tiket MDC na ka Congress namar ba kum ka Forum hi kam nym lah ban neh slem ne kut ha kawei ka sngi, na kata ka daw ba lada ngi pynieng ia ka ileksion kum ki kyrtong Independent kan buh jingartatien ia ki paidbah ba hadien ka ileksion shaei ngin pyniasoh kumta ban lait na kane ka jingaratien jong u paidbah, ngi la rai ban leit pyniasoh sha ka party Congress”, ong u Bah Sohtun. U la iathuh ruh, ba na ka liang ka Forum, hadien ba ka la bishar bniah ia ka nongrim treikam jong ki political party baroh, la shim ia ka rai ban leit pyniasoh beit sha ka party Congress, kumta la phah noh ia u kyrtong ka Forum ban leit pan tiket na ka party Congress bad u la ioh ia ka tiket, da kaba ai khublei ruh ia ki bor ka Meghalaya Pradesh Congress Committee kiba la bishar bniah halor kane ka kam ai tiket na bynta ka ileksion MDC 2025.

Shuh shuh ruh, u la pyntip, ba na ka liang ki nongialam ka UCPF lem bad ki nongkitkam bad ki nongkyrshan kin sa leit ban pyniasoh pura sha ka party Congress ha ak jingialang kaban sa long ha ka 21 tarik Kyllalyngkot ha Umroi kaban long ruh ka jingialang ban pynithuh ia u kyrtong ka Umroi Konstituensi bad ki kyrtong jong ka party Congress kiban aireng ha kane ka ileksion MDC na Ri Bhoi District.