28 tarik Rymphang yn sdang ka Dorbar Mang Tyngka ka Jylla

U Lamphang ka Iingdorbar Thaw Ain ka jylla u Thomas A Sangma hynne ka sngi ula lum ka jingialang jong ka Business Advisory Committee (BAC) bad ki la shim ka rai ban pynlong ia ka Dorbar Mang Tyngka ka Jylla ba 10 sngi ka ban sdang naduh ka 28 tarik u Rymphang haduh ka 13 tarik u Lber. Haba iakren bad ki nongthoh khubor, u Lamphang ula pyntip ba kane ka dorbar kan sdang naduh ka 28 tarik mynta u bnai bad kan kut ha ka 13 tarik jong u bnai ban wan bad la mang 3 sngi na ka bynta ka Private Member Business ne na ka bynta ki kam jong ki MLA.

 “Hooid, balei kam biang?. Lai sngi ban iakren ia ki kam ki MLA shimet shimet ka la biang palat. Ha kane ka Dorbar Mang Tyngka lai sngi yn iakren ia ka mang tyngka bad 2 sngi ia ka jingkren maitphang u Lat ka Jylla. Ka dei ban biang palat” la ong u Lamphang haba jubab ia ka jingbhah 3 sngi ban iakren ia ki kam jong ki MLA. U Lamphang ula kular ba ki dkhot kin ioh lad ban iashim bynta ha ki jingiatai bad ka por kan pahuh ia baroh ban iashim bynta bad lada jia ba duna ka por, yn pynjlan ia ka dorbar wat ha ka sngi Thohdieng.

Ha kane ka jingialang jong ka Business Advisory Committee (BAC) la shim bynta da u Symbud Myntri Rangbah ba khmih ia ka Parliamentary Affairs u Bah Prestone Tynsong, u Nongialam ka Liang Pyrshah u Dr Mukul Sangma, ki MLA kynthup ia u Bah Charles Pyngrope, Bah Lahkmen Rymbui, ki ophisar jong ka iingdorbar thawain ka jylla bad kiwei.