Kynnoh ka BJP ba shim kabu ki Seng Sain Pyrthei ha ka jingiakhih ki samla pule

Ka Meghalaya Bharatiya Janata Party (BJP) ka leh kiar ban pynpaw halor ka jingsaphriang ka jingpynsngew ha ka rynsan Social Media bad u Nongaiktien u Arnab Das ula ong, ba ka seng kam lah ban pdiang bad kitei ki jingkynnoh kiba thok.

Ha ka kyrwoh u Nongaiktien ka BJP u Arnab Das ula ong, ka seng ka la iakren pynbeit bad u President ka Yuva Morcha ha kaba ula kyntait ban pynmih ia kano kano ka jingkynthoh halor katei ka jingjia iakhih ki samla pule.

U Arnab ula maham ban shim ba ki jingpynsaphriang ia ki jingthoh ha ki rynsan Social Media da kaba kdew ha ki por ba la dep, ka la don ka jingleh thok ne ‘Hack’ ia ki ‘Account’ jong ki nongialam ka jylla.

“Ka jingphah kyrwoh ka seng ka dei kaba la iaid da ka lynti bad ki lad ba ia dei. Ngi kyntait ia kano kano ka jingkynthoh ka bym don jingkitkhlieh ban kynthup lang ia ngi” la ong u Arnab.

Ka BJP Meghalaya ka la ong, ba ka burom ia ka hok ki samla pule ba pynlong ia ka jingiakhih ha Jantar Mantar ha kaba ia dei bad ka mat jong ka NEET. Hynrei ka la kynnoh ba kiwei pat ki seng saiñ pyrthei ki pyrshang ban leh politik bad ban knieh nam bad burom ia katei ka jingiakhih.

Ka seng ka pynrem jur ia ka jingthombor ki pulit ha ka por ba pynlong ia katei ka jingiakhih bad kyntu ia ki samla pule ba kim dei ban ai lad ia ki seng saiñ pyrthei ban shim kabu ia katei ka jingjia.

U Das ula kynthoh jur ia ka seng Congress kaba pyrshang ban rung sha ka iingsah jong u Myntri Rangbah duh ka ri bad ong, katei ka dei ka jingpynkheiñ ain bad ka pynsyier ia ka jingshngain u Myntri Rangbah duh ka ri.

Ula pynapw ruh ka lah don ruh ka jingiaknieh bor hapdeng ka seng AAP bad Congress ban ialam nakhmat ia katei ka jingiakhih.

“Ka BJP kam kyrshan ia ki kam iaum snam. Ngi kwah ba katei ka jingiakhih kan long kaba jai jai” ula ong.

Halor ka jinglait tuh ki jingkylli eksamin NEET, u Das ula ong, ka Sorkar Pdeng ka la kem haduh 13 ngut bad u Myntri Rangbah duh ka ri ula pynthikna ba kan don ka jingwanrah ia ka jingkylla ba kongsan.

“Namar ka jinglong jingman bad ka jingheh jong ka ri bad ka jingiar ka rukom treikam, kum kitei ki jingkylla kin shim por. U Myntri Rangbah duh ka ri u ieng skhem ban ai ka lawei ba phyrnai ia ki samla pule jong ngi lyngba ka jingwanrah ia ki jingkylla ba iaineh ha ka pule puthi” ula bynrap.