Puk leit tur ki paidbah ha KHADC, 15 sngi ai por ban weng ia u Syiem Langrin

Ki Khun ki hajar ka Hima Langrin hynne ka sngi ki la bitar ia ka EC ka Khasi Hills Autonomous District Council (KHADC) kaba la thung biang ia u Paiem Nangtei Singh Syiem kum u Syiem ka Hima Langrin.

Ha kane ka sngi da ki spah ngut ki paidbah ka Hima Langrin ryngkat ki plakad ki la teit tur puk sha ophis ka KHADC bad ki la pyrshang ban jynrat wat ia ka khyrdop jong kane ka ophis, khnang ba kin ioh lad ban leit kynduh ia u CEM.

Hadien katto katne por, na ka liang ka EC ka la khot ia ki nongialam ka Hima ban wan sha ka miej iakren ban pynbeit ia ka mat jingdawa jong ki.

U Convener jong ki Khun ki hajar ka Hima Langrin u bah Wadlad Lyngdoh haba kren paidbah hadien ka jingiakynduh ia ki nongialam ka EC, ula pyntip ba ka jingiakren hapdeng ki nongialam ki khun ki hajar ka Hima Langrin bad u CEM, EM ka KHADC kam poi shano shano hadien ba ka KHADC kam lah ban ai ia kano kano ka rai halor ka jingdawa jong ki.

Ula ong namar ba ka KHADC kam lah ban ai ia ka rai, ki la buh por 15 sngi ba kan ai ia ka rai bad lada kam lah, kin wan ban tur biang sha KHADC ban shah thngan haduh ban ioh ia ka rai.

“U CEM um lah ban ai kano kano ka rai ia mynta namar ba ai daw ba ka rben palat ka file bad ula pan por ban bishar bniah,” ong u bah Lyngdoh haba pyntip paidbah.

Kine ki khun ki hajar ki la dawa ba ka KHADC ka dei ban weng noh ia u Paiem Nangtei Singh Syiem namar ki la kynnoh ba ula pynkhein ia ka rukom pyniaid Hima bad u la kam ei ia ka jaka ka Hima kum ka jaka ka kmie jong u.

Ki la kynnoh ba um shah shuh ban long ki dkhot ka dorbar Hima ia ki khun ki hajar kiba la dap 18 snem bad dei na kane ka daw ki la pyrshah jur ia u.

“Na ka liang u CEM u khlem lah ban ai ia ka jubab wat haduh ba la kut ka jingïakren, ka Council ka khlem lah ban ai ka jubab ba biang katkum ka jingkwah ka jong ngi” la pyntip u Convener ki Khun ki hajar ka Hima Langrin sha ki Paidbah.

“Ki don shibun ki lynti, ngin sa peit kaei ba ngin leh, lada u paidbah u ong ngin thiah hangne haduh ban ioh ia ka rai, ngin wan biang hapoh 15 sngi ban thiah tad haduh ba ka KHADC kan ai jubab ha ngi u khun u hajar ka Hima Langrin”, u la ong sha ki Paidbah.

Ki nongialam ka Hima ki la ther ruh ia ka Voice of the People Party (VPP) kaba ju pyrta ha ki snem ba la leit noh ban ai ia ka jingshynshar ba khuid ba suba hynrei ka jingleh jong ki mynta ka kham palat ban ia ki Executive Committee kiba rim.