Ym pat ïoh jingthoh ka UDP na kiba thmu ryngkang party : Titos

U General Secretary ka United Democratic Party (UDP) u bah Titosstarwell Chyne u la ong ba ka party haduh mynta kam pat shym la iohpdiang ia kano kano ka jingthoh ne ka kyntien na kita ki MLA kiba thmu ban ryngkhang party.

U bah Titoss haba kren sha ki lad pathai khubor, ula ong ba haduh mynta dang shu iohi tang na ki kot khubor ba ki don ki MLA ka party kiba thmu ban ryngkang noh sha ka party BJP.

Ula ong ba u la iakynduh la bunsien bad la iakren lyngba ka phone ruh hynrei, kim shym la kren shai ba kin phet sha kiwei pat ki seng. “ Ki MLA ka party kim shym kyntait bad kim shym pyntikna ba kin phet party,” ula ong.

Haba kylli halor ka jingpait ka party ka UDP kadei na ka jingtlot u President ban ialam ia ka party, u Bah Titoss ula ong ban shu kynnoh iano iano ka long kaba suk. Hynrei lada don kano kano ka jingeh ha ka party, ki lah ban kdew markhmat bad ka jingkhang ka plie ban iapynsngew ia ki jingeh kaba kim ia sngewtynnad.

Ula ong ba lada ka jingkyntiap seng jong ki, kadei na ka daw jong u ne jong u bah Metbah, ulong uba kloi ban hiar noh na ka kam ba u bat bad un ong ruh ia u bah Metbah ban hiar noh shuki noh na ka kam President.

U Bah Titoss u la ong ba lada peit ia ka histori ha ka jylla Meghalaya, ka jingphet ka jingrung ki MLA, kam dei shuh kaba phylla. Hynrei kaba sngewsih ka long ba kum ki seng riewlum naduh ba ioh ia ka Hill State ka la don ka jingiapait, ka jingiapait ba nyngkong kadei ha ka por jong ka APHLC.

Hynrei kaba sngewsih mynta ka kynti ka long ba ka jingapait ki seng riewlum, ka long ba ka jingpait ka long sha ki seng ri thor ki National Party.

Ula ong ba um tip haduh katno kita ki agenda jong ki National Party ki ban iada ia ki rit paid, hynrei kumba ka long haduh mynta ka jingkhih jingksaid ka dang iaid ban iada ia ka jaidbynriew na ka jingshah tyllep ki bor ba na shabar.