Bthah u Conrad ban pyndep kloi ki jingtei Meghalaya House ha kylleng ka Ri

U Myntri Rangbah ka Jylla u Conrad K Sangma hynne ka sngi ula lum ka jingialang halor ka jingpyntrei ia ki projek Meghalaya House kiba dang iai shakhmat ha kylleng ka Ri.

Ia ka jingialang la pyniaid da u Conrad Sangma lyngba ka Video Conference ryngkat u Myntri Sorkar ka Tnad General Administration Department (GAD) u Bah Sostheness Sohtun, ki ophisar ha kaba ki la iatai sani halor ka jingiaid shakhmat ki jingtei bad ki la iakren ruh halor ki tyrwa ba thymmai ban tei ia ki Meghalaya House. Ki la iakren shaphang ki project ha Delhi, Noida, Mumbai, Bengaluru, Vellore bad Kolkata bad buh ha khmat ban ai ka jingshakri bad ka rukom pyniaid ba thikna.

U Myntri Rangbah ula bthah ia ki ophisar ba kin pynthikna ba kin pyndep ia ki jingtrei ha ka por ba la buh bad ula ban jur ki jingpyntrei kin long kiba skhem bad shngain na bynta ka jingdonkam ki nongshong shnong ka Meghalaya bad ban ai ka jingshakri ba bha tam ia ki samla pule, ki nongpang ba leit wad shah sumar, ki nongtrei sorkar bad ia ki paidbah nongshong shnong.

U Myntri Rangbah ula ong, ka donkam ia kine ki jingtei ban ai jingshakri na ka bynta ki paidbah nongshong shnong ka Meghalaya shabar Jylla.

Ula bthah ia ka Tnad ba dei peit ban iai bteng ban peit ia ka rukom pyntreikam ia ki project bad ban pyntrei kloi ia ki kam ba dang sah khnang ba kine ki jingtei kin lah ban dep hapoh ka por ba la buh.

Kane ka jingbishar kam ka dei ka jingkut jingmut ka Sorkar ban pynlong ia ka Meghalaya kum ki jingtei ka juk ha baroh ki sorbah ka Ri ban ai jingshakri bad kyrshan ia ki paidbah ka Jylla haba ki leit jingleit donkam shabar ka jylla Meghalaya.