Markhmat ha u Amit Shah pynsngew u Bah Hek ba kwah rung BJP ki MLA UDP

U nongialam ba rangbah jong ka Meghalaya BJP uba dei ruh u MLA ka Pynthorumkhrah constituency Bah AL Hek hynne ka sngi ula leit ban iakynduh ia u Myntri ka tnat kam pohing ka Sorkar Pdeng u Amit Shah bad u la ong ba ka party ka dang pynkhreh ban ieng marwei bad ban thaw Sorkar marwei ha Meghalaya.

Haka kyrwoh hadien ba la wai ka jingialang bad u AmitShah, u Bah Hek u la ong ba u la ioh ia ka kabu ban iakynduh ia u Amit Shah na ka bynta ban iakren bniah halor ka jinglong jingman ka sain pyrthei ha Meghalaya.

Halor ka FCRA Bill kaba la pynmih ïa ka jingsngewkhia hapdeng ki kynhun riewngeit Khristan, u Bah Hek u la ong ba u Amit Shah u la pyntip ïa u ba ki jingïamir jingmut ki la ïaid shakhmat.

“U Myntri ka tnat kam poh iing u la ong ba u la dep iakynduh ym duna ia ka 35 tylli ki kynhun riewngeit Khristan bad ki nongialam ha kaba iadei bad ka FCRA. Kumba ka long mynta, ia kane ka Bill la phah sha ka Joint Parliamentary Committee ban iakren bniah. Hadien ba la dep leh bniah da ka JPC, un sa khot ia ngi sha Delhi ban iakren bniah” la ong u Bah Hek.

U Bah Hek u la ong ba u la iakren ruh bad u Amit Shah halor ka sain pyrthei ha Meghalaya bad ka jingkyrmen jong ka BJP ban ioh thaw Sorkar.

“Nga la pyntip ia ka jingbishar jong nga ia ka jinglong jingman jong ka sain pyrthei ha Meghalaya. Ka don ka lad ia ngi ban ioh thaw Sorkar marwei bad kum ka party kaba khlain, kaba lah ban ioh jingshaniah naki paidbah” u la ong.

Haba pynpaw ia ka bynta kaba heh na ka bynta ka BJP, u Bah Hek u la ong, “Nga la pan jingmut bad jingkyrkhu na u Amit Shah kumno ban pynkhlain ia ka Party jong ngi ha kylleng ka jylla, ban ioh ia ka jingshaniah na ki paidbah, bad ban trei bad ban thaw ia la ka jong ka Sorkar.”

Da kaba pynpaw ba don ka jingkylla kaba stet haka saiñ hima sima ha Meghalaya, u Bah Hek ula ong, “Ka jinglong jingman ha ka saiñ hima sima ka nang kylla. Ngi la pynkhreh ban shim ïa kane ka kabu da ka jingkut jingmut bad da ka jinglong ryntih.”

“Ka thong jong ngi kam dei tang ban iashim bynta ha ka sain pyrthei jong ka Meghalaya, hynrei ban ai ia ka jinglong nongialam kaba khlain, kaba skhem bad kaba don ka jingkitkhlieh lyngba ka Dorkar jong ngi hi” ula ong.