Kyntu u Lat ban pyniasohlang ia ka jingstad tynrai ha ka kam rep kam riang

Ka National Conference kaba lai sngi halor ka “Natural Farming: Pathways to Self-reliant Farming and Rural Prosperity (NCNF 2026)” kala sdang hynne ka sngi ha ka College of Post Graduate Studies in Agriculture Sciences (CPGSAS), Umiam.

Ia kane ka jingialang kaba la pynlong da ka Central Agricultural University (CAU), Imphal, la plie pyrda da u Lakshman Prasad Acharya u Lat ka Jylla Assam kum u Kongsan uba la pyllait paidbah ia ki kot kiba iadei bad ka rukom rep tynrai, kaba kynthup ia ka Abstract Compendium, ka Poster Book bad ka Media Chronicle ha ka jingdonlang ka Dr. Joram Aniya, Member, NITI Aayog, New Delhi, kum ka symbud kongsan, ha kaba la iadonlang katto katne ngut ki stad saïan ba pawkhmat ha ka rep ka riang, ki Vice-Chancellor jong ki skulbah ba pawkhmat ha ka rep ka riang bad ki nongmihkhmat na ki kynhun jong ki nongrep.

Haba kren ha kane ka jingialang, u Lat ula banjur ia ka jingdonkam ban pyniasohlang ia ka jingstad tynrai jong ka India ha ka ka rep ka riang bad ka jingsaindur thymmai katkum ka jingstad saïan ban kyntiew ia ka rep ka riang kaba iaineh bad kaba lah ban kyrshan dalade. Haba ban jur ia ka jingiar jong ki jingdon jingem ha ka mariang bad ka jingiar ha ka rep ka riang ha ka thain shatei lammihngi, ula ong ba kane ka thain ka don ka lad kaba khraw ban paw kum ka jaka pdeng jong ka rukom rep tynrai.

U Lat ula ban jur ba ka rukom rep tynrai kadei ban noh synniang ban kyntiew ia ka ioh ka kot jong ki nongrep lyngba ki kam kiba khlain kiba kynthup ia ka jingpynmih, ka jingpynkhreh, ka jingsong, ka jingpyniaid iew bad ka jinglah ban iohrung sha ki iew ki hat.

Ula kyntu ruh ban kyntiew ïa ki mar ba la ioh jingithuh GI bad kiwei kiwei ki mar tynrai hapoh ka jingthmu “Local to Global” bad ka banjur ia ka jingdonkam jong ki rukom rep kiba lah ban iaineh kiba iadei bad ka khyndew, ka suinbneng bad ki jingdon jingem jong ka thain bad ka kyntu ia ki stad saïan, ki nongrep bad ki nongthaw polisi ban pyniasoh lang ia ka jingstad tynrai bad ka jingwad bniah kaba katkum ka juk mynta ban kyntiew ia ka rukom rep tynrai kum ka jingkhih jong ki paidbah.

Ka Dr. Joram Aniya kala ban jur ia ka jingiadei kaba jan hapdeng ka jingkoit jingkhiah jong ka khyndew, ka jingbha jong ki jingbam bad ka bha ka miat jong ki briew bad banjur ia ka jingdonkam ban pynduna ia ka jingshaniah palat ha ki jingpyndonkam ia ki dawai.

Kala ong ba ka rep ka riang kaba iaineh kan don ka bynta kaba kongsan ban pynurlong ia ka jingthmu jong ka Viksit Bharat 2047.

Ia kane ka jingialang kaba lai sngi, la pynlong ha ka jingiatreilang bad ka ICAR, New Delhi; DST–NECTAR, Shillong, Rani Lakshmi Bai Central Agriculture University, Jhansi, Dr. Rajendra Prasad Central Agricultural University, Pusa bad ka Gujarat Natural Farming Science University kaban iashimbynta da 500 ngut kiba kynthup ia ki nongrep, ki nongrep kiba dang pyndonkam ia ka rukom rep tynrai, ki nongthaw polisi, ki nongwad bniah, ki samla pule, ki nongmihkhmat na ki karkhana bad ki riewshemphang.