Bthah u MR ïa ki ophisar ban shim jingthoh ïa man ki jingeh ba pynsngew ki paidbah

U Myntri Rangbah ka Jylla u Conrad K Sangma hynne ka sngi, ula bthah ia ki Ophisar jong ki tnad bapher bapher ba kin shim jingthoh ia man ki jingeh bala pynsngew da u paidbah bad bthah ba kin leh eiei noh mardor kham kloi kat kaba lah.

U Conrad Sangma ula kren ia katei ha ka jingialang jongka CM-Connect ha Rongara, South Garo Hills.

Ki nongshongshnong ka Rongara kila pynsngew ia ka jingsngewkhia halor ka jingbym ioh umbam.umdih kaba thikna ha Lower Nekora, pan ia ka centre ban pynlong ia ki Board exam bad ki sienjam ban tehlakam ia ka jingshlei um ha Iew Lower Nekora kaba don marjan ka madan ialehkai. Ki la pynsngew ruh ia ka jingsniew ka surok Ampanggre–Wasogittim ha kaba u Myntri Rangbah ula bthah ia ki Ophisar ka Tnad PWD ba kin leit shim jingkhein wut wut ia ka bynta ba nyngkong jong ka Jingkieng bad ban maramot noh ia ka surok bad ba kin sdang noh ia ka kam khlem da pynslem shuh.

U Myntri Rangbah ula kubur ba man ki jingeh kim dei kiba lah ban pynbeit mardor, hynrei, ula kular ia ki nongshongshnong ba ka Sorkar kan sa shong bishar ia man kawei pa kawei ka jingdawa.

“Watla ngan sa ai ka jingbthah ia ki kam kiba lah ban pynbeit noh mardor, kin don ruh kiwei ki kam kiba hap ban shong bishar bad ban leh ia kaba donkam” ula ong.

U Conrad ula ong “Ka CM-Connect kala pynlah ia nga ban sngewthuh ia ki jingeh ba la mad da ki shnong ba sha kyndong eh jong ka South Garo Hills bad ngan pyntikna ba ki shnong kin ioh ia ka umbam ha man ki thliew iing”.

Kiwei pat ki jingdawa ki kynthup ia ka jingpynbha bad maramot ia ka Bungalow ha Moheshkola, ban kyntiew kyrdan ia ka Jujolgre LP School, kaba la don ia ka tnum kaba pei um bad ka kynroh kaba la khyllem.

U Conrad Sangma ula sam ruh ia ki tiar Maternal and Child Care sha ki nongioh bynta. Kane ka dei ka prokram kaba la sdang pyntreikam na Siju-Rangara bad hadien yn sa pyntreikam ha baroh kawei ka Jylla.