Bthah u Bah Prestone ban buh ktem pulit shipor ha ka thaiñ Langpih

Ki nongshong shong jong 3 tylli ki shnong khappud bad ka Assam kata ka Kampaduli, Noapara bad Bangjen West Khasi Hills kila dawa na u Symbud Myntri Rangbah ka Jylla u Bah Prestone Tynsong ban buh ktem Pulit ban ai jingshngain iaki nong shong shong.

Hashuwa kane ki nongshong shong ha ka jingialam u MLA u RG Momin bad u MDC Bah Lurshai Kharbani kila iakynduh ia u Symbud Myntri Rangbah ban ujor halor ka jingpynbor ki ophisar ka Sorkar Assam ban pynrung kyrteng ha ka jinglum khanasamari (Census) ia ki nongshong shong ka Meghalaya.

Haba kren sha ki lad pathai khubor u Bah Lurshai Kharbani ula iathuh ba ki don ki ophisar ka Sorkar Assam kiba wan sha ki shnong ban pynbor ia ki paidbah ban pynrung kyrteng haka jinglum khanasamari (Census).

U Bah Lurshai ula iathuh ba ki nongshong shong kila dep ujor sha u Deputy Commissioner (DC) bad u Superintendent of Police (SP) ka West Khasi Hills bad kane kala punlong ia ki ophisar ban sangeh wan sha ki shnong ka Meghalaya.

“Mynta ka sngi ngi la iakynduh ia u Symbud Myntri Rangbah bad ngi la dawa ban buh daka ktem Pulit khnang ban ai jingshngain iaki nong shong shong ha ki thain khappud Meghalaya-Assam” la ong u Bah Lurshai.

“U Symbud Myntri Rangbah ula kular ban iakren bad u Chief Secretary ka Assam ban bthah ba ki ophisar ka Sorkar Assam kim dei ban pynbor ia ki nongshong shnong ka Meghalaya ban pynrung kyrteng ha ka jinglum khanasamari” ula ong.

U Bah Lurshai ula ong ba ki nongshong shong jong ka shnong Kampaduli, Noapara bad Bangjen West Khasi Hills kila dep pynrung kyrteng haka jinglum khana sumari jong ka Meghalaya namar kata ki pyrshah jur iaka jingwan ki ophisar ka Sorkar Assam.

U Symbud Myntri Rangbah ka Jylla u Bah Prestone Tynsong ula ong ba ula bthah ia u Chief Secretary bad Director General of Police ban shong bishar haba iadei bad ka jingdawa buh ktem Pulit ba shipor ha ki thain Langpih West Khasi Hills.

Ula iathuh ba kila don lypa 2 tylli ki ktem Pulit ne Border Outpost ha ki thain Langpih, kata kawei ha Langpih bad kawei pat marjan bad ka Jylla Assam.

U Bah Prestone ula ong, ba ula bthah ia u Chief Secretary ban iakren shwa bad u Chief Secretary ka Jylla Assam ban iapynbeit halor ka jingkynnoh wan rung jubor ki ophisar ka Sorkar Assam.

“Lada ki ophisar na baroh artylli ki Jylla kim lah pynbeit, yn pynbeit shwa ha ka kyrdan Myntri Sorkar bad hadien kata yn pynbeit ha ka kyrdan Myntri Rangbah Jylla” la ong u Bah Prestone.

Haba iadei bad ka jingdawa buh ktem Pulit, u Symbud Myntri Rangbah ula ong “Ia kata ngan sa shong bishar hynrei nga la bthah ia Chief Secretary bad Director General of Police ban shong bishar halor kane”.