Ym sngewhun ka KSU ia ka rukom tei ia ka Facilitation Center ha Umling

Ka Khasi Students’ Union (KSU) North Khasi Hills District ryngkat bad ki bor District Ri-Bhoi, mynta ka sngi kila leit jurip ïa ka Facilitation Center ha Umling, kaba dei kawei na ki mat dawa jong ka KSU na ka Sorkar Jylla, khamtam ha kaba ïadei bad ka jingpyrkhing ïa ka rung ka mih jong ki briew kiba wan na shabar ka jylla.

Ka Khasi Students Union North Khasi Hills District, kala ïeng pyrshah ia ka jingthmu jong ka Sorkar ban tei da ka Food Court lane ka jaka bam ha katei ka ba la tei ïa ka Facilitation Center kadei ban long ka jaka talasi ïa ki kali kiba rung sha ka jylla, khnang ban ïarap ruh ha ka jingïakhun pyrshah ïa ki kam sniew bapher bapher, khamtam ïa ka jingwanrah bad wan rung u drok.

Haba kren sha ki lad pathai khubor hadien ka jingjurip, u President ka KSU North Khasi Hills District, Bah Ferdynald Kharkamni ula pynpaw ïa ka jingbym sngewhun jong ka seng halor ka rukom pynbeit ïa ka jaka treikam jong ka Facilitation Center namar ba la lap ïaki jaka treikam jong ka Facilitation Center lane ki kamra la tei pynrit, katba ka jaka bam lane ka Food Court pat ka long kaba heh.

U Bah Ferdynald Kharkamni ula iathuh, ha u snem 2020, la rai ban pynlong ïa ka Facilitation Center kum ka jaka ban pyrkhing ïa ka jingrung bad ka jingmih jong ki briew kiba wan na shabar ka jylla Meghalaya. Ka jingthmu ka long ban pynbeit bad pynkhlaiñ ïa ka rukom peitngor ïa ki briew kiba wan rung shapoh ka jylla, da kaba buh lang ïa ki tnad treikam jong ka Sorkar bapher bapher hapoh kane ka jaka.

Ula pynshai ruh ba ka Tnad Tourism kan peit ïa ki kam kiba ïadei bad ki nongwan jngohkai, katba ka Tnad Labour, lyngba ka Meghalaya Residents Safety and Security Act (MRSSA), kan peit ïa ki nongbylla kiba wan rung shapoh ka jylla lem bad kiwei pat ki tnad treikam ki ban don bynta ban lum bad pynshisha ïa ki kot ki sla bad ki jingtip kiba donkam.

La ong ruh ba lyngba kane ka Facilitation Center, yn lah ruh ban pynkhlaiñ ïa ka jingpyrkhing ïa ka jingrung jong ki kam sniew shapoh ka jylla, khamtam eh ïa ka jingsaphriang jong u drok, kaba la sdang ban kham jur ha ki bynta bapher bapher jong ka Meghalaya.

U Ferdynald Kharkamni ula pynpaw ba ki dap da ka jingsngewkhia halor ka rukom pynbeit ïa ka jaka treikam hapoh kane ka Facilitation Center ha kaba la buh 2 tylli ki jaka treikam bad kawei ka jaka shong jahthait, ha kaba ka jingheh jong ka jaka baroh ka long tang kumba 1,000 square feet.

Ula iathuh, ka jaka kaba la shim da ka Tnad Tourism na bynta ban buh ïa ki 11 tylli ki dukan bam ne food court ka long haduh 11,500 square feet.

U Bah Ferdynald ula pynpaw ba kane ka jingïapher kaba khraw ha ka jingheh jong ka jaka kala pynlong ïa ka Seng ban duh mynsiem bad ban kylli balei ba ki tnad treikam kiba don bynta ban peit ïa ki kam kiba kongsan kum ka jingpyrkhing ïa ka jingrung bad jingmih jong ki briew, ka jingpeit ïa ki nongbylla bad ka jingpyrkhing ïa ki kam sniew, ki hap ban treikam ha ka jaka kaba rit, katba ka jaka na bynta ka food court pat la pynheh haduh 11,500 square feet bad kane kam ïa hap bad ka jingthmu ban pyntreikam ïa ka Meghalaya Residents Safety and Security Act (MRSSA) 2016.

Ula ong, ba ka seng kam pyrshah ïa ka jingtei ïa ka Food Court lane ban wan rah ïa ki lad ïohkam ïohjam na bynta ki samla, hynrei ka seng ka pyrshah ïa jingpynkylla dur ïa katei ka jaka bad la pyrshang ban tei pat da ha kawei ka bynta ka bym ïahap bad ka jingthmu jong katei ka jaka.

Ula ong, ka KSU ka ïengskhem ba ka jaka kaba la tei kyrpang na bynta ka Facilitation Center kadei ban treikam katkum ka jingthmu ba la buh, ym ban pynkylla ïa ka sha kiwei pat ki jingtei kiba lah ban pynduh ïa ka jingthmu tynrai jong kane ka jaka.

Ka KSU ka dawa na ki tnad sorkar kiba dei peit ba kin bishar bniah ïa ka rukom pynïaid bad pynbeit ïa ka jingtei ha katei ka jaka, khnang ban pynurlong ïa ka jingthmu ba la buh na bynta ka Facilitation Center bad ban pyntreikam hok ïa ki mat kiba ïadei bad ka MRSSA bad ka seng kan dang ïaid buddien ïa kane ka kam haduh ban da ioh ïa ka jingthoh kaba shai na ka sorkar halor ka jingpynurlong ïa ki jingdawa jong ka seng.

Hadien kata, u la ong, ka seng kan sa pyrkhat ïa ka jingai jingïatreilang bad ka Sorkar ha kaba ïadei bad kane ka bynta.