Na ka daw ba mynjur ïa ka ‘Resolution’ ba sa poi ïakhun u DRL Nonglait na ka NPP

U Prof. Dr. D.R.L. Nonglait u kyrtong ka NPP ha ka ilekshon shiteng samoi jong ka MP Lok Sabha ula ong, ba ka daw kaba la pynlong ia u ban iakhun ia ka ilekshon na ka seng NPP ka dei namar ba u la sakhi ba dei tang kane ka Sorkar kaba la ialam da ka NPP kaba la mynjur ia ki ‘Resolution’ hapoh ka iingdorbar thawaiñ ka jylla kiba long kiba kongsan bha na ka bynta ki paidbah ka Jylla Meghalaya.

U Prof DRL Nonglait ula kren ia katei haba ialap elekshon ha Madan Umden jong ka Nongpoh Constituency kaba la pynlong da ka seng NPP ia kaba la wan ban iashimbynta da ki nongialam ka seng NPP bad ki paitbah na kylleng ki shnong jong kane ka thaiñ.

U DRL Nonglait ula ong, ha ka por ba ki nongialam ka NPP kila wan ban kyrpad ia u ban iakhun ia ka elekshon ula pan por na ki bad ula pyntip ba un sa ai ia ka jubab halor ka jingtyrwa ka jongki, kumta hadien ka jingiasyllok bad kiba bun ki nongialam, ki riewshemphang, ki riewrangbah bad kiba bun balang bad khamtam haba ula bishar bniah ia ki kam kiba la trei da ka Sorkar hapoh ka jingialam ka NPP ula shim ia ka rai ban pdiang ban iakhun ia ka elekshon shiteng samoi jong ka MP Lok Sabha na ka seng NPP.

Ula ong, ba ki Sorkar kila leit kila wan, hynrei dei tang kane ka Sorkar kaba ialam da ka NPP kaba la mynjur ia ki Government Resolution ban dawa na ka Sorkar Pdeng ban pynrung noh ia ka ktien Khasi bad Garo ha ka Khyrnit kaba Phra jong ka riti synshar ka ri, ban dawa na ka Sorkar Pdeng ban pyntreikam noh ia ka Inner Line Permit (ILP) ha Meghalaya bad kala mynjur ruh ia ka Resolution ban pyrshah ia kano kano ka jingthmu ban tih ia u marpoh khyndew u Uranium uba don ha ka jylla.

Ula ong, ba kadei tang kane ka Sorkar ha ka jylla kaba la ithuh ruh ia ka ktien Khasi bad Garo kum ki ktien Sorkar ne Official Language jong ka Jylla bad kane ka Sorkar kala leh ia kiei kiei kiba long katkum ka jingkwah bad jingangnud jong ki paitbah ka jylla namar ba ka dei ka sorkar jong u paitbah bad kala theh ruh ia kiba bun ki kam pynroi ha kylleng ki bynta jong ka Jylla.

U Prof. Dr. D.R.L. Nonglait ula pynkynmaw ruh ba mynshwa kum u nongialam ka KAS ula pynlong ia ka jingiakhih ha Delhi ban dawa ban pynrung noh ia ka ktien Khasi ha ka Eight Schedule jong ka riti synshar ka ri bad lada ki paitbah ka jylla ki jied ia u ban leit ban mihkhmat sha ka iingdorbar Parliament un iai bteng ban shimkhia ha kaban tynruh ia ki mat jingdawa kiba kongsan jong ka jylla bad ban iatrei ryngkat lang bad ka Sorkar Jylla na ka bynta ban wanrah ia ki projek kam pynroi ki bapher bapher na ka bynta ka bit ka biang bad ka roi ka par jong ka jylla baroh kawei.

Na ka liang u President ka NPP Meghalaya u Bah Prestone Tynsong ula kyrpad ia ki paitbah ba kin jied bad ba kin pynjop donburom ia u Dr Nonglait ha ka elekshon namar u long u kyrtong uba biang tam na baroh, khnang ba un iasaid na ka bynta ki mat jingdawa jong ka Jylla bad ban shimkhia bad ka Sorkar Pdeng ba kan theh ia ki kam pynroi ha ka Jylla Meghalaya kaban long ka jingmyntoi ia ki nongshong shnong ka Jylla baroh kawei.

Ka seng NPP kala pdiang burom ruh ia ki nongialam jong ki seng sain pyrthei ki bapher bapher kiba la wan ban rung noh sha ka NPP da ka jingthmu ban pynkhlain ia ka seng bad khamtam ha kaban ai jingkyrshan pura ia u Dr Nonglait ha ka elekshon MP Lok Sabha.

Ha kane ka jingialang la ioh ruh ia ka jingkren na u Myntri Sorkar uba long ruh u nongialam ka NPP u Bah Sosthenes Sohtun, ka MDC ka Nongpoh Constituency ka Kong Rona Khymdeit, ki MLA bad MDC barim, ki nongialam, ki nongkitkam ka NPP bad ki paitbah kiba la wan na kylleng kane ka jaka.