Ryngkat bad ki sniang ïaid paidbah ki nongrep ban dawa bailutksan

Ki nongrep ba ri sniang na kylleng ka Jylla Meggalaya hynne ka sngi ha ryngkat ki sniang kila pynlong ka jingiaid kjat na Civil Hospital Point shaduh Madan Malki.

Kane ka jingiaid kjat kadei ban dawa naka Sorkar Jylla ban mad noh iaka ram kaba ki nongrep kila shim ban thied sniang khun naka skhim Piggery Mission jong ka Sorkar Jylla.

Haka jingiaid kjat ki nongrep ba ri sniang kila pyrta ban dawa naka Sorkar ban buh noh daki kyrdop lane Check Gate ban pyrkhing iaka jingwan poi ki sniang na bar ka Jylla.

Kila dawa ruh naka Sorkar ban pynkhlain iaka jingtalasi bad bishar bniah iaki kot ki sla ban pynshisha ba ki sniang ba wan na bar ka Jylla kidei kiba koit ba khiah.

Haba kren shaki lad pathai khubor u General Secretary ka Hill Farmers Union (HFU) u Bah Alfon Kharsyntiew ula ong ba ki nongrep kila dep ban pynsngew shaka Sorkar halor ka jingeh ba ki nongri sniang ki kynduh namar ka jingwan lynshop ka khlam African Swine Fle (ASF) hynrei haduh mynta naka liang ka Sorkar kam pat shim iaki sienjam ban iarap iaki nongri sniang.

U Bah Alfon ula iathuh ba ki nongrep ki kmen hadien baka Sorkar ka wanrah iaka skhim Piggery Mission bad bun ki nongri sniang kila iatreilang bad ki Cooperative Societies, Farmers Producer Organizations bad Producer Groups ban shim ram ban thied khun sniang.

“Hynrei ka jingwan lynshop ka khlam ASF kala wanrah ka jingduh nong iaki nongri sniang bad katkum ka jingioh lum jingtip daka HFU, ki don ym duna 1200 tylli ki longiing kiba shah ktah namar ka khlam ASF” la ong u Bah Alfon.

“Ngi dawa naka Sorkar ba kadei ban iarap iaki nongri sniang kata da kaba mab noh iaka ram ba kidei ban siew haba ki shim ram ban thied khun sniang” ula ong.

U Bah Alfon ula ong ruh ba ki nongri sniang ki dawa naka Sorkar ba kadei ban pynieng noh daki khyrdop (Check Gate) haki thain khappud bad ban pyntreikam iaka Standard Operating Procedure (SOP) bala pynmih daka tnat Animal Husbandry and Veterinary Department haka 19 tarik Naitung 2023.