Ka Katakey Committee ka pynpaw ka jingtih dewiong ka dang bteng ha Jylla: Mukul

U Nongialam ka Liangpyrshah u Dr Mukul Sangma hynne ka sngi ula kynnoh ba ka jingiai paw pyrthei ka jingtih dewiong beain, ka kdew shai ba ka Sorkar Jylla, kam don ka jingkitkhlieh ban khang ia ki kam beain ba ia dei bad u dewiong hapoh ka Jylla. Haba kren sha ki lad pathai khubor u Dr Mukul ula kam na ka por sha ka por, ki kam tih dewiong beain ki ïai paw pyrthei ha kylleng ka Jylla Meghalaya hynrei ka Sorkar haduh mynta, mynne kam nud ban leh eiei. U Dr Mukul ula ong, ba ki kam beain halor u dewiong ha Meghalaya ki paw pyrthei bad ïa kane la sakhi ruh ha ka kaiphod jong ka Katakey Committee na ka por sha ka por. U la ong ba ka Section 21 jong ka MMDR Act 1957 ka kdew shai ba ka dei ka kamram jong ki Sorkar Jylla ban tehlakam ia ki kam tih dewiong beain bad ki Sorkar Jylla ki lah ruh ban shim sienjam pyrshah ia ki donkti ha kine ki kam beain bad u dewiong.

“Ka kaiphod jong ka Katakey Committee ka pynpaw ia ki kam beain ba ia dei bad u dewiong. Namar kata ka dei ka kamram ka Sorkar ban pynduh jait ia ki kam beain bad lada ka Sorkar kam lah ka dei ban shim ka jingkitkhlieh” la ong u Dr Mukul. U Dr Mukul ula pynpaw ruh halor ka jingsaphriang ki khubor ba ka tnat Enforcement Directorate (ED) ka Sorkar Pdeng ka la pynlong ka jingtalasi ia ki nongkhaii kiba donkti ha ki karkhana Coke hapoh Meghalaya. “Nga kwah ban iai ban ba lada ka don shisha ki kam beain haba ia dei ba ki karkahana Coke hapoh Meghalaya kane ka mut ba ki bor Sorkar ha kine ki District ba don karkhana Coke ki dei ban shim sienjam bad ka Sorkar ka dei ban leh eiei” u la bynrap. U Nongialam ka Liangpyrshah ula ong ka jingpynduh jait ia ki kam tih bad shalan dewiong beain ka dei ka kamram jong ka Sorkar na ka bynta ka bha ka miat ka Jylla ban iada ia ka jinglait tuh ka khajna ba dei ban ioh lum na u dewiong.

“Ha ki por ba la leit, nga la thoh sha u Chief Secretary (CS) ka Jylla bad nga kyrmen ba ka Sorkar kan leh eiei bad kan pynshitom ia kiba donkti ha ki kam beain ba ia dei bad u dewiong hynrei haduh mynta ngam pat ïohi ki sienjam ba ka Sorkar ka shim” u la ong. Ula bynrap ka Meghalaya ka dei ka Jylla ba duna ki lad kyntiew khajna bad ia ka pla tyngka jong ka Sorkar khamtam ban siew bhah khajna ia ki District Council ban iarap ia ki ban siew tulop ia ki Nongtrei. “Ka long kaba shisha ba ki District Council ki ioh bhah khajna na u dewiong. Lada ïa u dewiong la khaïi beain, kumno ka Sorkar kan ioh pynlang pisa ban siew sha ki District Council. Namar kane nga ong ba ka Sorkar ka la pulom ban iada ia ka bha ka miat ki paidbah bad ka Jylla” ula kynnoh.