Hiar ki heh UDP ha Jaintia ban pan jingkyrshan ia u kyrtong MP

Ki nongialam ka party United Democratic Party UDP ba kynthup naduh u President bah Metbah Lyngdoh, u Secretary bah Titos Chyne, u MLA ka Mowkaiaw bah Nujorki Sungoh lem ki MLA/MDC barim na Khasi bad Jaiñtia ki la hiar ha Jowai mynta ka sngi ban pan jingkyrshan na ka bynta u kyrtong MP jong ka party u Vivant G Kynta ha ka jingialang ba la pynlong ha Community Hall ka dorbar shnong Tpep Pale.

Ha kane ka jingialang ki nongialam kila pynshai ia ka nongrim jong ka party bad ruh ki bynta jongka ha ka saiñ hima sima kumba ka dei kawei na ki seng riewlum ba la rim bha.

Ki ong ruh ba wat lada don ka jingkhih phaloh ka saiñ hima sima ha kine ki sngi khamtam ka khubor ban sa rung BJP ki MLA UDP, hynrei ka party pat ka dang khlaiñ bad ym don jingktah ei ei namar ba ki nongkyrshan jong ka kiba ieid seng riewlum ki skhem ka nongrim.

U bah Titos Chyne u ong ka politic kam juh kylla hynrei dei ki briew hi ba kylla ia ka nongrim, ha kaba ki kren sha ki paidbah kumwei bad leh pat da kumwei na ka bynta ka myntoi shimet da kaba klet noh ia ki nongrim ba ki la leit sha u paidbah.

U Titos u iaroh ruh iaki kam u Vivant G Kynta kum u nongiasaid aiñ namar haka por ba u iatreilang ha KHADC ym don kawei ruh ka case ban shah rem.

Naka liang u Nujorki Sungoh haba pan jingkyrshan na u paidbah u ong lada u Vivant G Kynta u jop un iakhun hapoh parliament kumba iakhun case ha high court kata ban jop beit.

U bah Metbah Lyngdoh haba kren u ong, don kiba ialam bakla ban ong ba ka UDP kala leit pyniasoh BJP, halor kane u ong em ka UDP kan neh ka party UDP hi la ka jong, wat lada ka hap ban leit synrop bad kano kano ka political party ha kano kano ka por ba donkam.

U ong kane dei ka nongrim ka party bad ymdon ruh kano kano ka rai ki nongialam ban leit pyniasoh bad kiwei pat ki party.

Bad lada kino kino ki nongmihkhmat kiba rai leit pyniasoh kata dei ka rai jongki hi shimet shimet ym jong ka party.

Naka liang u kyrtong u Vivant G Kynta haba kren u ong ka jingthmu ki national party ban wan bsuh khlieh sha kane ka Jylla dei namar ba ki don ka jingthmu sha lyndet kata ban ioh khlong uranium l.

U ong ba ula juh ngop teng haki jingtyrwa buit tuh ka BJP ha kaba ula hap ban kiar noh bad rai ban ieid iala ka seng riewlum.

Shuh shuh u ong la don ka jingkular thok pynthame ka BJP da kaba ong, lada phi wan pyniasoh ngin ai jingithuh iaka ktien khasi.

Halor kane u ong ba u Amit Shah um donbor ei ei ruh ban shuh ai haka pliang ia kata ka ktien Khasi naka bynta ban thep hapoh ka 8th schedule, hynrei donkam ban ioh ka jingmynjur ba kyrpang kaba mut 3 pawa naka jingdon ki dkhot hapoh parliament naka bynta ban pynrung ia kano kano ka ktien.

“Kane kam dei kaei kaei ban shu ai haka pliang da kaba ong wan shangi ngin ai iaphi kane” bynrap u bah Vivant G Kynta.