Ka jingweng ia ka ‘Nofication’ ka pynpaw ba don jingbakla halor ka SPF, ong ka VPP

U President ka Voice of the People Party (VPP) u bah Ardent Miller Basaiawmoit ula ong ba ka jingdawa ka party ban weng kam ia u Vijay Kumar Mantri kum u Commissioner and Secretary ka tnad pule puthi ka jylla, ka dei namar ba u pynkylla khah khah ia ka Notification. U bah Ardent ula ong ba une u ophisar ha ka shi taiew u pynkylla arsien ia ka Notification ha kaba wat shiteng miet ruh, ka ju don ka jingpynkylla ia ka Notication. Kane ka pyni ba ka rukom pyrkhat jong u Commissioner ka long ka bym biang bad ka bym skhem.

Ia kane u Bah Ardent ula pynpaw sha ki lad pathai khubor hadien ba u Lat ka Jylla u CH Vijayashankar, u la pynbna ban wengnoh ia ka jingthung kam ia ki nonghikai lyngba ka Structure Pay Framework (SPF). “Kawei kaba ngi iohi na ka jingweng noh ka sorkar ia ka Nofication, ka pyni ba ka sorkar ka kam ba don ka jingbakla bad ngi sngewtynnad haba ka sorkar ka pynbeit ia ki jingbakla bad ka sngap ia ki jingpynsngew,” la ong u Bah Ardent. Ula ong ba ka jingweng ka sorkar ia ka Notification, ka dei ka jingjop jong ka jingiai kren ka party na ka por sha ka por ia ki jingeh jong ki nonghikai. U Bah Ardent u la ong ba ka party nyngkong ka pynpaw ia ka jingbym sngewiahap halor ka SPF, kaba la pynmih da ka Sorkar, kumta ka party ka hap ban dawa ban weng noh ia kane ka notification.

Ha kajuh ka por, u bah Ardent ula ther ia ka sorkar namar tang ha u Vijay Mantri ka pynkit haduh kumba 15 tylli ki tnad sorkar, kumno un lah ban leh hok shuh ia ka kam. Kane ka dei ka jingpheil jong ka sorkar ban bhah bad pyntyllun ia ki kam.Ha kajuh ka por ula ai khublei ia ki nonghikai ba kynthup ia ka APSTA, ki nonghikai deficit kiba shimkhia ban mih shakhmat ban pyrshah halor kane ka notification jong ka tnad pule puthi ka Sorkar Jylla. U la ong, “Ngim kren tang namar ba ka dei ka seng sain pyrthei, hynrei ngi kren namar ba ngi don ka jingkitkhlieh kum ki nongialam.