Dawa u Bah Sanbor ban tohkit ba pynkiew khajna bai wai jaka ha Contonment

Ki nongialam ka BJP-Meghalaya, ki la dawa na ka tnad shipai ka Sorkar Pdeng ban tohkit halor ka jingpynkiew kynsan ka Contonment ia ka khajna bai wai jaka ha Shillong Contonment Area. Ki Nongialam ka BJP hapoh ka jingialam u MLA Bah Sanbor Shullai ryngkat u President Rikman G Momin bad kiwei kiwei ki nongialam ka seng, ki la iakynduh ia u Myntri Khynnah ka Tnad Defence Sanjay Seth ha ka 29 Tarik u Kyllalyngkot bad pynsngew ia ka jingeh halor ka jingpynkiew kynsan ia ka khajna bai wai jaka kaba la ktah jur ia ki nong shimwai ia ki jaka ha Shillong Contonment.U Bah Sanbor Shullai ula kyntu ia ka Shillong Contonent Board, kaba hap hapoh ka jingkhmih jongka Directorate General of Defence Estate, ba kan pynlong ia ka jingtohkit ia kane ka kam kaba long ka jingpynkhein ia ki kyndon bala buh ha ka 1937 CLAR bad ka dor bala buh kumjuh naduh u snem 1990 ter ter, la sakhi ia ka jingkiew kynsan kynsan ha u snem 2009, kaba la ktah jur ia ki nongshong shnong.

U Bah Sanbor Shullai ula pynpaw ba ka jingiakhun ban dawa ia ka hok kan iai bteng haduh ba ia kane ka kam yn pynbeit bad ai jingjop ia ki nongshong shnong.Kane ka kynhun kala leit ruh ban iakynduh ia u Director General ka DGDE u G.S Rajeswaran uba la kular ban shimhkhia ha kaban pynbeit noh mardor ia kane ka kam. U Bah Sanbor ula pyntip ruh ba u don ia ka jingthmu ban khot sngewbha ia u Myntri Khynnah ka Tnad Defence ban wan sha Shillong ha u Iaiong 2025 khamtam ba une u Myntri Sorkar u don ia ka jingthrang ban wankai sha kane ka Jylla.

Ka Meghalaya BJP kala pynpaw ba ka iengskhem ha kaban wad ia ki lad ki lynti ban pynbeit noh ia katei ka kam kaba ktah ia ki riewpaidbah ban pynthikna ba kan ym don kano kano ka jingleh shilliang khmat hapdeng ki nongshong shnong kiba sha ha ka Municipal bad Cantonment ha kaba iadei bad ka jingsiew ia ka khajn a.