Kyntu u Conrad ïa ki MCS ban don ïa ka jingkitkhlieh haba shakri paidbah

U Myntri Rangbah ka jylla u Conrad K Sangma hynne ka sngi Baar, ula kyntu ia ki ophisar Meghalaya Civil Service (MCS) kiba dang ioh jinghikai, ba kin don ia ka jingkitkhlieh bad ka jingthmu jong ka kam shakri paidbah. U Conrad ula kren ia katei, ha ka Induction Training Programme jong ki 35 ngut kiba la shah jied kum ki Meghalaya Civil Service (MCS) Officers, Batch 2025 ha ka jingialang kaba la long ha Meghalaya Administrative Training Institute (MATI), Shillong ha kaba la iadonlang u Additional Chief Secretary ka jylla u Shakil Ahmed, u Commissioner & Secretary ka Tnad Personnel bad ki heh ophisar ka jylla. U Myntri Rangbah ula ai khublei ia ki ophisar MCS kiba don hapoh ka jingioh jinghaki halor ka jingshah jied ka jongki bad ula pynkynmaw ia ki halor ka jingkitkhlieh bad ka jingthmu jong ka kam shakri paidbah bad ula kyntu ia ki ba kidei ban peit ha ka dur kaba iar bad ban trei naduh mynsiem, da ka jingjaijai bad da kaba buh hakhmat eh ia ki paidbah.

Ula kyntu da kaba ong “Phin jam sha ka kyrdban ban bat ia ka bor, hynrei ka jinglong nongialam kadei na ka bynta ban shakri ym na ka bynta ka bor. Ka rai kaba phin shim kan dei kaban ktah ia ka jingim ki briew. U khulom uba phi bat u kham khlain ban ia ka waitlam, kaba lah ban ai ia ka jingbishar kaba hok, ban pynbeit ia ki jingeh bad ban wanrah ia ka jingkylla, pyndonkam bha da ka jingshemphang”. U Conrad ula banjur ruh ia ka jingkongsan ban long kiba don akor, ba long ryntih, ban iadei bad baroh bad ula kyntu ia ki ophisar ba kin iengskhem ha ka nongrim ka jongki wat hapdeng ba ki mad ia ki jingeh bad ki jingtynjuh bad ula kyntu ruh iaki ba kidei ban bat ia ki kam kiba eh da ka jingmut bad ka jingpyrkhat kaba bha bad ban shim ruh ia ki jingeh kum ki lad ba kin nangkiew shaphrang ha ka kam ka jongki. “Ka jingioh jinghikai ka jong phi kan ym kut noh tang hangne. Man la ki kyrdan kiba phi ioh ban bat ne trei kan long kum ka lad ba phin ioh ia ka jinghikai. Long kiba don ia ki jingtip kiba thymmai, sngewthuh ia ki skhim jong ka sorkar bad man la ka por pyrshang beit ban thaw ia ki lad ki lynti ban wanrah ia ka jingkylla kaba shisha” la ong u Myntri Rangbah.

Katba ka Director General jong ka MATI, ka Kong R.V. Suchiang, kaba dei ka IAS ophisar kaba la shongthait, kala kren shaphang ki jingeh bad ka jingkitkhlieh ha ka kam shakri paidbah bad kala pynkynmaw ia kine ki ophsiar kiba ioh jinghikai, ba ka jingdon ia ka nongrim bad ia ka akor ka burom ki long ki bynta kiba kongsan tam ha ka kam shakri paidbah. “Kin don ki por kaba phin hap ban jied hapdeng kaei kaei kaba suk bad kaei kaba dei. Jied da ka jingshemphang, namar ka jingjied da ka lynti kaba lyngkot, kan lam sha ka jinghiar jong ka jingtbit ka jong phi” la ong ka Director General.