Sha Delhi Hiar ka HANM ban pynkynmaw iaka sorkar india halor ka ILP, u Pud u Sam, ka ktien khasi

Ka Seng Hynniewtrep Achik National Movement hapoh ka jingialam u president Rangbah u bah Lamphrang Kharbani haka 25 tarik u Rymphang 2025 kala hiar sha Nongbah Delhi ban pynlong ïaka Jingiakhih ha Jantar Mantar ban pynkynmaw biang iaka sorkar India halor ki lai tylli ki mat kiba ka seng shi snem tam mynshwa kala dep ban pynlong iaka jingiakhih haka Jantar Mantar, kaba la ioh ruh ban ai daka jingthoh sha ka sorkar India halor kine ki lai tylli ki mat jingdawa. Ki 3 tylli ki mat Jingdawa kiba ka seng kala dep ban ai daka jingthoh sha ka sorkar india ki kynthup iaka jingdawa ban pyntreikam noh iaka Inner Line Permit (ILP) hapoh ka Jylla Meghalaya, ban pynbeit noh ia u pud u sam hapdeng ka jylla Meghalaya bad ka Jylla Assam bad ban pynrung noh iaka ktien Khasi bad Garo haka 8 schedule jong ka constitution jong ka ri India.

U President ka Hynniewtrep Achik National Movement, Eastern West Khasi Hills District u bah Artist Ryntathiang haba kren ha kane ka jingiakhih u la ther tyngeh ia ka sorkar India da kaba kren syndon da ka ktien Hindi khnang ba ki heh sorkar ka sorkar India kin sngewthuh shai ia ka jingeh jong ki nongshong shnong jong ka jylla Meghalaya khamtam eh ban pyntreikam noh ia ka Inner Line Permit khnang ban iada na ka jingshah wan tyllep ha ki briew kiba nabar, ban pynbeit  noh ia u pud u sam hapdeng ka jylla Meghalaya bad Assam khnang ba ki nongshong shnong jong ka jylla Meghalaya kiba sah ha khappud kin ym shah pyndik bad kumjuh ruh ban pynrung noh ia ka ktien Khasi bad Garo ha ka khyrnit kaba phra jong ka constitution jong ka ri India khnang ba ki samla kin ioh ia ka lad ban thoh ha ka ktien lajong kumba long kiwei pat ki jaitbynriew haba ki ia khun ia ki eksamin bapher bapher bad kiwei pat ki jingdonkam.

U President rangbah ka seng u bah Lamphrang Kharbani u la pynkynmaw ba shisnem tam mynshuwa ka HANM ka la wan ban iakhih ha Jantar Mantar ban dawa na ka bynta kine ki lai tylli ki mat hynrei haduh mynta ruh ka sorkar India ka dang sngap jar jar bad kala shu ai daw ba ki dang eksamin. Ha kane ka sien kaba ar u la ong ba ka HANM ka wan ban pynkynmaw bad ban pan jubab balei ba ka sorkar ka pynslem bad kaei ka daw ba kim lah ban ai noh ia kine ki lai tylli ki mat khamtam eh ka ILP.U la byrngem ruh da kaba ong ba Lada ka sorkar India ka dang iai pynslem, ha ka wat kaba lai ka HANM kan ym sngap jar shuh bad kan ym ieh noh ha shiteng lynti ia ki jingdawa hynrei kan tur sha Parliament. U la ong ba baroh shikatta haba wan iakhih sha Delhi ki burom ia ka ain da kaba pan jingbit kumba dei ka rukom ban leh hynrei ha ka sien kaba lai kan ym pan jingbit shuh hynrei kan wan ban tur puk ha Parliament.