Shah jied u Bah Thombor kum u CEM, u Sankey kum u Chairman

Ha ka ilekshon jied CEM ba la pyniaid da u Chairman ka JHADC u Dr. Sankey Shangpung hapoh ka ïing dorbar ka Council ha ka nohphai sngi 28/02/2025 na ka bynta ar ngut kiba la thep kyrteng kynthup u Madonbai Rymbai bad u Thombor Shiwat la shim bynta tang kumba 20 ngut ki MDC lait noh u Chairman, katba  ki MDC ka VPP baroh 8 ngut ki khlem wan shim bynta. Ha kane ka ilekshon u Thombor Shiwat ula shah jied kum u CEM da kaba ioh 17 vote u Madonbai Rymbai 3 vote. Hadien ba u Thombor Shiwat ula shah jied kum u CEM, ki MDC kynthup u Madonbai Rymbai, u Hambertus Nongtdu, u Krison Langstang, Moonlight Pariat, u Rikut Pareiñ, u Wailad Dame Siangshai,  u Medling M Swer bad kiwei ki la ai jingkren kitrwiang ia u bah Thombor ba un treibha ia ka kam bad ialam ia ka Council namar ha ki 6 snem ba la dep ka la mad ia ka jinghiran pisa.

Na ka liang u chairman ruh haba ai ka jingkitbok kitrwiang ia u CEM, ula kyntu ruh ia baroh ki para MDC ba kin burom ia ka ïingdorbar ka JHADC bad ban iatreilang ryngkat naduh kiba don ha ka liang synshar bad liang pyrshah ba ma u ruh kum u Chairman un pyniaid hok ia ka dorbar khlem kano kano ka jingshah liang. Hynrei ula pynpaw ka jingsngewsih ban iohi ba baroh ki MDC ka VPP ki khlem wan mih hapoh ka ïing dorbar haka sien shong ba ar ban jied CEM, katba ha ka sien shong ba nyngkong na ka bynta ka election jied Chairman ha ka por mynstep jong kane hi ka sngi ki ia donlang baroh. Kham shwa la pynlong ia ka ilekshon jied chairman ba la pyniaid da u DC ka West Jaiñtia Hills District u Abhinav Kumar Singh da ka jingthep vote (secret ballot) na bynta ar ngut kiba iakhun kynthup u Rikut Pareiñ bad Dr Sankey Shangpung, u Sankey Shangpung ula shah jied kum u Chairman ba thymmai ka Council.

Ha kane ka jingthep vote la shim bynta da baroh ki 29 ngut ki MDC. Ka jingioh vote u Dr Sankey Shangpung ka long 20 vote, u Rikut Pareiñ 6 vote, katba 3 vote pat la ioh ka NOTA. Katkum ka jingtip ba tikna la ong, ha ka Ballot la buh tang ia ki kyrteng ki ar ngut ki Candidate hynrei ia ka NOTA la shu thoh khulom hi da ki MDC bym lah ban tip. U Dr Sankey Shangpung  ula shah jied kum u Chairman ha ka sien ba ar namar ha ka EC ba la dep ruh u long kum u CEM