Ban pynkhlain ia ki lad jingsumar, yn tei thymmai sa 151 tylli ki Sub-Center

U Lat ka Jylla u CH Vijayashankar haba ai jingkren hynne ka sngi sdang jong ka iing Dorbar mang tyngka ula ong, lyngba ka skhim Pradhan Mantri Ayushman Bharat Health Infrastructure Mission (PM-ABHIM), ka Sorkar Meghalaya ka la shim ia ki sienjam ban pynkhlain ia ki lad jingsumar ha man ki shnong hapoh ka Jylla. Ula ong ka sorkar jylla kan shim ki sienjam ban pynkhlain ki lad jingsumar kynthup ban tei thymmai haduh 151 tylli ki Sub-Center ha ka jinglut T.55.5 lak kawei ka Sub-Center bad ïa kine yn tei hi da ki Village Health Council.

U labynrap na ki 151 tylli ki Sub-Center ba la mang, 60 tylli ki Sub-Center la dep ban tei bad 21 tylli ki la sdang ban treikam ban ai jingsumar ia ki nongshong shnong. U la pyntip nalor ki Sub-Center ka Sorkar ka la mang rung ban tei 10 tylli ki Integrated Public Health Labs ha ka jinglut ym duna 11.25 klur kawei ka IPHL. “Namar ka jingshim khia ka Sorkar ban pynkhlain ia ki lad jingsumar, ka Jylla ka la sakhi ka jinghiar haduh 49% ka jingkhlad ki longkmie ar met bad 32% ka jingkhlad ki khyllung ha u snem 2024” la ong u Lat ka Jylla.

U la ong ka Megha Health Insurance Scheme (MHIS) bad ka Ayushman Bharat PMJAY ka la iarap 5.30 lak kawei ka longiing bad kumba 7 lak ki longïing kynthup 3.8 lak hapoph ka skhim PMJAY. Ka MHIS ha ka wat 6 la pyllait ha Nailur 2023, ka kynthup lang ban ai jingmyntoi ban sumar ia ki longkmie, khyllung bad kiwei ki jait jingpang.