Pyntreikam ka sorkar ia ka skhim OTS, 45 hajar kin ioh jingmyntoi

U Myntri Rangbah ka Jylla Conrad K Sangma hynne ka sngi Ba-ar u la pyllait paidbah ia ka One Time Settlement (OTS) Scheme na bynta ki nongthang bording ilektrik ka MeECL ha ka jingdon ryngkat u Myntri ka tnad bording Abu Taher Mondal. Haba kren ha ka jingialang u Myntri Rangbah ula ong, kumba 45000 ngut ki nongthang bording elektrik kin ioh jingmyntoi bad palat T.26 klur na ka Surcharge ne ka jingoh dor tam ryngkat bad ka jingdain kuna yn sa map noh. “Ki nongthang bording kin hap ban siew tang ia ka bai trai ba 40% bad 60% ba sah kin siew da ka Instalment khlem ka sut” la ong u Conrad. Ula kyntu ia ki nongthang bording ba kin shim kabu ia ka skhim bad ban shim ia ki jingmyntoi ba la ai da ka Sorkar Jylla. U Conrad ula ong, kane ka sienjam ka dei ban pynduna ia ka jingkit ba khia ki nongthang bording, ki bym lah ban siew bai bording ba la sahteng. Ka OTS scheme kan treikam naduh ka 1 tarik haduh 31 tarik Lber, 2025 bad tang ki longiing ba shah ot ka bording ilektrik, ki lah ban aplai ia ka OTS scheme ban ioh jingmyntoi. Kane ka scheme kan treikam tang ia kiba pyndonkam ia ki Domestic Low Tension (DLT) bad Kutir Jyoti/ BPL kiba la pynbna ba ka bording ilektrik ba ki thang ka long hapoh ka 5 KW, jong ki longiing ba la shah ot bording namar ka jingbym siew bai bording, khnang ban ioh siew noh ia ka bai bording ba sah baroh.

Ka bai bording ba dangsah ka la kot T.119 Klur ba ki nongpyndonkam ki dei ban siew. U Conrad Sangma ula ong, ka tnad ka la shim katto katne ki sien jam ban pynthikna ban ai jingshakri ba bha ia ki nongpyndonkam bording ilektrik jong ka Meghalaya Energy Corporation Limited (MeECL). Ha kane ka sngi, u Myntri Rangbah ula pyllait ruh 6 tylli ki kali ban pyndonkam da ki Lineman ka MeECL ban maramot ia ki sainar ilektrik bad kiwei kiwei. Ka MePDCL ka la pyndonkam ki kali kiba kumto, hynrei mynta kan pyndonkam da ki kali ba kyrpang ba don ki jingkieng bad ki kor ki bor ban lah ban kiew shajrong ban pynthikna ba ki Lineman kin lah ban pynduna ia ka por ka jingbym don bording ilektrik. Ka Meghalaya Power Distribution Corporation Limited (MePDCL) ka la pynlut haduh T.1.48 Klur ban thied 6 tylli ki kali kyrpang . U Myntri Rangbah ula pyntip mynta u snem, kan ym don ka jingpynlip bording ilektrik ne Load Shedding bad ula iaroh ia ka tnad ba la shim bun ki lad ki lynti ban wanrah jingkylla ha ka jingtreikam ka MeECL ban ai jingshakri ba kham bha.

 “Ka jingduh nong ha ka AT&C ka la hiar ym duna ia ka 18 percent,” ula bynrap. Ula pyntip ka sorkar ka dang pyrshang ban pynbiang ia ka bording ilektrik khamtam ha ki thain nongkyndong, ba kynthup ka jingthaw thymmai ia ki Sub station bad ki kam kin sdang noh naduh u bnai ban wan ban thaw ia ki 10 tylli ki Sub station ba thymmai.