Ka kamram ka DIPR ban pynsngewthuh ia ki paidbah ia ki skhim sorkar: Ampareen

Ka Directorate of Information and Public Relations (DIPR), ha ka 5 tarik u Lber, ka la pynlong ia ka Conclave ha State Convention Centre, Shillong, halor ka mat “Emerging Trends in Public Communication – Redefining the Role of DIPR” ia kaba la plie da  ka Myntri ka tnad IPR ka Dr. M Ampareen Lyngdoh, kum ka kongsan. Ha kane ka jingialang la iadonlang u Additional Chief Secretary ka jylla u Dr. Shakil P. Ahammed kum u symbud kongsan, ka Kong Patricia Mukhim ka Editor jong ka Shillong Times, u Vijay Kumar Mantri u Commissioner & Secretary ka IPR, u Bah B.S. Sohliya, Secretary & Director ka  I&PR, ki heh ophisar jong ka DIPR bad kiwei kiwei.

Ka Kong Ampareen Lyngdoh kala ban jur iaka kamram kaba kongsan jong ka DIPR ban pynthikna ia ka jingsam ia ki jingtip jong ka sorkar sha ki paid nongshong shnong bad kumta ka kamram jong ka DIPR ka donkam ban don noh ia ka jingmut kaba thymmai.“Ha kane ka pyrthei kaba iaid sted, ka long kaba kongsan ba kane ka tnad kan shim ia ki lad katkum ka jingkylla ka por ha ka jingpynsaphriang ia ki jingtip, ban pynthikna ba ki sienjam kiba la shim da ka sorkar bad ki skhim kin poi shaduh ki jaka kiba jngai bad sha man la ki nongshong shnong kiba don ha kylleng ki jaka” la ong ka KongAmpareen.

Kala ong, ba kamram jong jong ka DIPR ka long kaba kongsan bha ha kaban pynsngewthuh ia ki paidbah shaphang ki skhim sorkar kaba ki paidbah ki lah ban ioh bad kam dei eh tang ban iohi ia ka jingdon, hynrei dei ban pynthikna ba ia ka khubor dei ban ioh ban pdiang da ki paidbah, sngewthuh bad kin leh ruh ia kaba donkam.