Ki Basa na bynta ki nongdie madan ha Parking Lot Police Bazar

Ka sorkar ka la angnud la slem ban kynriah noh ia ki nongdie madan ha ki lynti iaid kjat ha Police Bazar, Laitumkhrah, Civil Hospital bad khamtam ha surok na Motphran ha Them Bijoy ka jingjyllei ki nongdie madan ka la pynthud ia ka iaid ka ieng ki paidbah nongleit nongwan. Ka sorkar lyngba ka tnad kam pynroi ka la shimkhia ban kynriah noh ia ki nongdie madan sha kiwei ki jaka bad ka jingshna ia ki dukan na bynta ki nongdie madan ka dang iaid shakhmat ha Parking Lot pyrshah ka State Bank bad kumjuh ha Parking lot MUDA ha Police Bazar. Hynrei ym lah ban tip la ki nongdie madan kin pdiang ne em ban leit shong ki dukan ha kitei ki jaka ba ai sorkar ha kaba ki paidbah kim ju leit.

Kum ban pynpaw ia kane ka mat u Myntri ka tnad jngohkai pyrthei u Bah Paul Lyngdoh ula shimkhia ban pynkynriah ia ki nongdie madan ban lait ka jingkhapniah ki paidbah nongleit nongwan, bad ban pynlong ia ka Khadailad ka jaka ba kylluid bad itynnad bad ki kiwei jaka ha nongbah Shillong ban khring ia ki nongwan shangkai pyrthei. La iathuh ia kitei ki dukan ne stal la shna da ka tnad kam pynroi sor. Lah ban pynpaw ka jingthmu ka MUDA ban shna ia ki parking lot ha nongbah ka long na bynta ki kali ba wan na ki thain kyndong ban suk ki paidbah leit ban wan bad ban lait ka jingsahkut kali. Hynrei kine ki parking lot mynta ki kylla Shopping Complex, kumta ka wanrah jingdheng kali ha kylleng ka nongbah namar ha ki jaka ba la shna kyrpang ba pynieng kali ki shna noh da ki dukan.

Kane kam dei tang ha Parking Lot pyrshah ka State Bank ha Police Bazar, hynrei kumjuh ha kiwei ki Parking Lot MUDA kum ha Police Bazar, Iewmawlong, Ajalee, Khlieh Iewduh, Garikhana bad kiwei. Halor kane la suba ka lah ban don ka jingleh sop sop ki bor pyniaid ka MUDA bad Municipal ban ai lad ia ki briew ban shna dukan ha ki Parking Lot ban ioh jingmyntoi shimet.