Yn pynshitom bad dain kuna ia kiba pynkhein ain niah kali

Namar ka jingnang jur ki jingjia kiba sngewsih tang namar ka jingdon jong ki nongñiah kali kiba niah khlem akor bad dih buaid, ka jingbym pynbiang ia ki kot ki sla jong ki kali, ka tnad pulit jong ka Nongpoh Police Traffic Branch ka la pynbna ban pynkhreh ban daiñ kuna kaba 10000 ia kito kiba pynkhein ia ka Motor Vehicle Act. Ia kane ka sienjam jong ki pulit la pynbna ruh hadien ka jingiakynduh lang bad ki nongkitkam ka Nongpoh Region Auto Owners and Driver Association (NRAO&DA), hadien ba la lap ba bun na ki nongñiah kali la ki dei kiba ar shaka, lai shaka bad saw shaka ki ju mlien ban niah ia ki kali hadien ba la shoh u khawiang kaba buh jingma shikatdei ia kiwei pat, ka jingbym pynbiang ia ki kot ki sla bad kiwei kiwei ki jingpynkhein ain niah kali.

Na ka liang u Bah B. Thangkhiew, Traffic Officer, u la pyntip ba ki bor pulit kin pyntreikam noh ia ki jingpyrkhing kiba tyngeh na bynta kito kiba pynkhein ain niah kali katkum ka Motor Vehicle Act 1988 jong ka kyndon 185 ban pynshitom ia kiba pynkhein ain bad khamtam ka jingdain kuna kaba 10 hajar tyngka ia kito kiba niah kali hapdeng ka jingshoh khawiang. La pyntip ruh, ba baroh kiba niah kali kamai ki dei ban pynbiang ia ki kot ki sla naduh ki permit, ki Registration, Insurance bad kiwei kiwei ki kot ba donkam lem kumta kin shah daiñ kuna, ha kaba la kyrpad ruh ia ki trai kali ban shim jingkitkhlieh ban pynbiang ia ki kot ki sla jong ki kali kamai paidbah.

Na ka liang u Bah Banasar Lyngdoh, President ka NRAO&DA, u la pynpaw ia ka jingkmen ban ia treilang bad ki bor pulit pyniaid kali da kaba kyrpad ruh ia baroh ki nongñiah Auto rickshaw ba kin kohnguh bad bud thik ia ki kyndon ain niah kali khamtam ban kiar na ka jingia dih kiad haba niah ia ki auto bad ruh ban pynbiang ia ki kot ki sla ba pura khamtam eh ia ki trai kali ban pynbit pynbiang ia ki kot ki sla.