U Myntri Rangbah ka jylla hynne ka sngi ula plie ia ka CM CONNECT Centre ha Sohiong bad ula plie ruh ia ki khyndai tylli ki maw nongrim ban tei ia ki kam pynroi kaba la kot T. 140 klur tam.
Ka CM Connect kadei ka prokram ban wanrah lang ia ki paidbah, ki kynhun shnong, ki tnad sorkar ha kawei ka rynsan na bynta ban ailad ia ki nongshong shnong ban iakren bad iashem markhmat bad u Myntri Rangbah bad kadei ruh ka rynsan ban ailad ia ki paidbah ban pynsngew markhmat ia ki jingeh jong ki haba iadei bad ka umbam umdih, ka rep ka riang, nalor kiwei de.
Ki paidbah ki la sakhi ruh ia ka jingplie ia ki maw nongrim na bynta ban wanrah ia ki prjek bapher bapher na bynta ban kyntiew ia ki kam pynroi kynhup ka kam jngohkai, ki surok, ki umbam umdih, ka rep ka riang, bad kiwei de ki kam pynroi ha ki shnong ki thaw.
Ha shwa kane, u Myntri Rangbah ula plie ia ka Block Integrated Development Complex (BIDC), ka Block Resource Centre (BRC) ha ka ophis jong Block Development Officer, Sohiong C&RD Block bad u la buh maw nongrim ruh na bynta ban shna ia ka Futsal ground.
Ha kajuh ka por, na bynta ban pynkhlain ia ka kynhun shnong, na ka liang u Myntri Rangbah ula sam ia ka cheque kaba la kot sha ka T.23 lak sha ki kynhun SHGs, T.20 lak na bynta ki kynhun shnong Village Organisations (VOs) bad la mang kumba T. 4.13 klur na bynta ka Cluster Level Federations (CLFs).