Bitar ka DS Mawlyndep ba kiew palat bai thang bording

Ki nongialam ka Dorbar shnong Mawlyndep ki la pynpaw ka jingbitar halor ka jingkiew shaba palat ka bai thang bording nalor ka jinglip bording ba khah khah ha kane ka shnong.Haba kren sha ki lad pathai khubor, u Rangbah shnong ka Mawlyndep Jinu Khabuki, ula ong ba ki nongshong shnong ki mad shibun ki jingeh namar ka jingbym shim khia ka sorkar bad ka tnad bording halor ka jingkiew bai thang bording bad ka jinglip bording na ka por sha ka por kaba la ktah ia ki khynnah kiba dang pynkhreh ia ki eksamin jong ki.U bah Jinu ula ong ba ki paidbah ki wan ujor sha u halor ka jingkiew ka bording bad kum u Rangbah shnong ula shimkhia da kaba leit kynduh ia ki bor ba dei khmih bad ki la aidaw ba la sniew u Meter.U Rangbah Shnong ula iathuh ba ki don ki iing kiba rit kiba don tang 3 ne 4 tylli ki bulb hynrei ka bai thang bording man u bnai ka kiew na ka T.300 sha ka T.1000 tam.

“Ki iing barit don tang lai saw bulb hynrei ka bill pat kaba heh. Lada don jingthut u meter kiba dei khmih kidei ban pyntip sha ki trai iing khnang ban ioh bujli bad kim dei ban shu ai lymmuh ia ka bai thang ding,” ong u Rangbah shnong.Ha kajuh ka por ula bynrap watla ki sah hajan ka wah Umiam hynrei ka jinglip bording ka long kaba khah khah.Ula iathuh ba mynshwa don ki nongtrei ba pura bad ar ngut ki lineman hynrei mynta um don nongtrei bad don tang uwei u nongtrei Casual uba hap ban peit haduh 28/29 tylli ki shnong.“Da slap ruh lip bording da beh lyer barit ruh lip bording namar ba tang uwei u nongtrei um lah shuh ban peit ia ki 29 tylli ki shnong,” ula ong.

Na ka liang ka Dorbar shnong ka la kyrpad ia ka tnad ba kadei ban shimkhia bad ban buh kham biang ki nongtrei khnang ban lah ban ai ka jingshakri ba biang sha ki paidbah.U Rangbah shnong ula kyntu ruh ia ka sorkar bad ka tnad ba lada don ki meter kiba thut dei ban pyntip ia ki trai iing khnang ba kin lah ban kylliang da uba thymmai. Dei ban ai da ka jingthoh ym ban ai lymmuh ka bai thang bording.