Pyllait ‘One Health’ ka NHM ban pynduh jait jingpang Rabies

Ka National Health Mission (NHM), Meghalaya ha ryngkat ka jingiatreilang bad ka tnad ka koit ka khiah ka jylla, ka tnad ri jingri bad ka Cre-India Foundation (Collaborate for Rabies Eradiction India), ki la pyllait paidbah ia ka jingtreikam ka ‘One Health’ ban pynduh jait ia ka jingpang Rabies kaba saphriang na ki Ksew sha ki briew.

Kane kan sdang treikam naduh ka 22 tarik Jylliew ha baroh ki shnong bad ki dong jong ka thain Laitumkhrah.

Ha kane ka jingialang la donlang ki nongtrei sorkar, ki doktor ba tbit ha ka koit ka khiah , ki doktor mrad bad ki nongialam shnong khnang ban suk ka jingpyntreikam ia ka jingthmu jong ka One Health’ .

Ka jingthmu jong ka One Health ka long ban pynduhjait ia ka jingpang rabies kaba saphriang na ki ksew sha ki briew, ban ai jingshai halor kumno ban iada na kane ka jingpang.

Haba kren ha kane ka sngi, u Dr. Paul N. Chyne u Director (MCH & FW) ula kyntu ban don ka jingiatreilang , khnang ban lah ban pynkut noh ia ka jingsaphriang ka jingpang .

Katba u Dr. David T. Sun na ka Directorate of Animal Husbandry and Veterinary, Meghalaya, ula ong ba watla ka jingpang Rabies kadei kaba ma, hynrei lah ban ai ki jingiada lyngba ka jingshimkhia ki trai kiba ri ia ki mrad, ka jingai dawai tikna ha ka por ba biang.

Na ka liang u Dr. Harish Tiwari u Director ka CRE India, ula ong ba ki sienjam ki long na bynta ban pynduh jait ia ka jingpang rabies lyngba ka rukom iatreilang kaba pyniasnoh ia ki dkhot treilang bapher bapher.

Ula ong ba donkam ban pynduh jait ia kane ka jingpang da kaba lah ban shim haduh 70 percent ki tika ia ki ksew kiba don ha ki dong bad ki thain jong ki shnong.

Ula pynpaw ia ka jingkut jingmut jong u ha kane ka kam da kaba u noh synniang T. 1 lak sha ka mission. “ Nga kwah ba shisien ka sngi, ka jylla Meghalaya kadei ka jylla kaba nyngkong ha India kaban lait na ka jingpang rabies bad nga kwah ban pyllong ia kane ka jingthrang kaba shisha,” ula bynrap.