Dawa ka FKJGP ba thung kam ia 125 ki Junior Engineer

Ka Federation of Khasi Jaintia and Garo Peoples (FKJGP) hynne ka sngi ka la dawa na u Myntri ka Tnad Bording u Abu Taher Mondal ban thung kam noh ki kam ba lait hapoh ka MeECL naduh u snem 2018, namar ka jingpynslem ka sorkar khang lad ia ki samla ba la pyndep jingpule ban ioh kam.

Haba iakren bad ki nongthoh khubor, u President ka FKJGP u Bah Dundee C Khongsit ula ong, kila don 130 tylli ki kam kiba lait thylli ha ka kyrdan Assistant Executive Engineer bad Assistant Executive Engineer bad kila don ruh 125 tylli ki kam kiba lait ha ka kyrdan Junior Engineer bad haduh mynta, ka sorkar jylla kam shym la thungkam ia ki samla ha kitei ki kam kiba lait thylli.

U Nongialam ka FKJGP ula ong “Ngi la dawa na u Myntri Sorkar ban pyndap noh ia ki kam kiba lait thylli bad lada ka sorkar jylla ka sngap jar ne kam shim ia kino kino ki sienjam ban pyndap ia kitei ki kam kiba lait thylli, kan ktah jur ia ki samla kiba la nang la stad ban iohkam iohjam kiba la lah ban shimti ia kitei ki kam kiba lait bad katkum ki jingtip kiba la iohlum da ka seng kitei ki kam kila lait thylli naduh u snem 2018.

“Ngim shym la ioh ia kano kano ka jingkular na u Myntri Sorkar hynrei ula pyntip pat ia ngi ia ka shaphang ka jinglong jingman jong ka MeECL ba ka sniew bha, namar ka jingioh lum ia ka khajna ka long kaba duna bha hynrei ka jingduh nong pat ka jur bha bad kumta kaei kaei kaba ki iohlum kam lah satia ban pyndap ia ka jingdonkam ka jongki” la ong u Bah Dundee.

Haba kylli ka kane ka jinglait thylli ki kam ka ktah pat ia ka jingtreikam jong ka MeECL, u nongialam ka FKJGP ula ong ba ia kitei ki kam kiba lait thylli la don kiba la shu thungkam da ka kontrak bad ka seng kala pynpaw ia ka jingbym sngewtynnad ba ka sorkar kan thungkam ia ki samla da ka kontrak namar kan ktah jur bha ia ka lawei ka jongki.   

Ka seng ka ieh ha ka jingstad jong ka sorkar jylla ban thungkam ia ki samla kiba la nang la stad ha kitei ki kam kiba lait khnang ba ka jingpyndep ka jongki ia ka jingpule kan ym long kaba lehnohei bad lada ka sorkar jylla kam leh eiei ne ka sngap jar ia ka jingdawa, kumta ka FKJGP kan sa shong pyrkhat ban shim noh da kiwei pat ki sienjam halor kane ka mat.